افغان چارواکي وايي چې د هلمند لپاره د طالبانو تش په نوم والي ملا عبدالرحيم له خپلو څلورو ملګرو سره وژل شوی دی.
د هلمند والي جنرال محمد یاسین ازادي راډیو ته وویل، ملا رحیم چې په ملا عبدالمنان مشهور و، په نوزاد ولسوالۍ کې په یوه هوايي برید کې وژل شوی او په څلورو ملګرو کې یې دوه تنه ويندويان حافظ راشد او ملا جاويد او همداراز دوه ساتوونکي یې شامل وو.
جنرال یاسین وايي، ملا عبدالرحیم د دې ترڅنګ د هېواد په کچه د وسله والو طالبانو د نظامي چارو مسؤل هم و.
اخوا د طالبانو یوه ویاند قاري یوسف احمدي رسنیو ته په یوه استولې خبرپاڼه کې د هلمند لپاره د طالبانو له خوا د نومول شوي والي ملا عبدالمنان اخوند مړینه تأیید کړي ده.