د بلخ ولایت چارواکي وايي چې د طالبانو په وسیله د ۲۵ تنو برمته شویو مسافرو د خوشې کېدو هڅې روانې دي.
د بلخ د والي ویاند منیر فرهاد ازادي راډیو ته وویل چې دوی هڅه کوي څو برمته شوي مسافر د قومي مشرانو په منځنګړیتوب او له طالبانو سره د مذاکرې له لارې خوشې کړي.
هغه وويل، که د دولت ضد وسلهوالو سره د قومي مخورو دا خبرې بېنتیجې پای ته ورسېدې، دوی به په نظامي اقدام لاس پورې کړي.
منیر فرهاد
فرهاد په دې اړه ووېل:
"د سیمې مخورو او مشرانو منځګړيتوب کړی او هڅې کوو چې دا کسان ژر خوشې شي، که یادې خبرې بېنتیجې وې، بیا به موږ له پوځي ځواکه کار واخلو."
د سرپل له بلخاب ولسوالۍ د بلخ پر لوري روان دوه فلانکوچ ډوله موتړ چې ښځینه سپرلۍ پهکې هم وې، د بلخ ولایت د کشنده ولسوالۍ په اق کپرک سیمه کې تېره ورځ طالب وسلهوالو درولي او یوازې یې ۲۵ تنه نارینه مسافر چې پهکې د بلخاب ولسوالۍ د سیمه ییزو پولیسو ۳ قوماندانان هم شامل وو، نامعلوم ځای ته انتقال کړي دي.
ویل کېږي چې د یادو موټرو تر توقف مخکې د وسلهوالو طالبانو په ډزو کې یوه ښځینه مسافره ټپي شوې هم ده.
د بلخ ولایت اوسېدونکي له دولته د مزار-سرپل لارې د امنیت د خوندي کېدو غوښتنه کوي او وايي چې برمته شوي کسان باید ژر خوشې شي.
د مزار شریف دوه تنه اوسېدونکي وايي:
"زما نوم حامد رسولي دی، د مزار-سرپل لاره نا امنه ده، دولت باید د مسافرو د خوشې کېدو په اړه هڅې وکړي او هغوی خوشې کړي."
"زما نوم نجیب دی، له بلخ ولایته، د مسافرو د خوشې کېدو په اړه باید حکومت لازم اقدامات ترسره کړي، دا اړینه ده چې برمته شوي کسان له کومې صدمې لېدو پرته ازاد شي."
د بلخ د پولیسو ویاند شیر جان درانی وايي چې د سرپل-مزار غرنۍ لاره په امن کې ده او هلته د ملي پولیسو پوستې او تم ځایونه شتون لري.
طالب وسلهوالو ازادي راډیو سره په خبرو کې یوازې د بلخاب ولسوالۍ د ۳ سیمهییزو پولیسو د غړو د برمته کېدو پړه پر غاړه اخیستې ده.
راپور: مجیبالرحمن حبیبزی