په غزني ولايت کې یوه ډله پولیس د غلا په تور نيول شوي دي.
د غزني چارواکي وايي، هغه ۷ پولیس نیول شوي چې له خلکو به يې په غیرقانوني توګه پیسې اخېستې او غلاوې به يې کولې.
د غزني ولایت د امنیه قوماندانۍ له جنايي جرمونو سره د مبارزې مدیر محمد قاهر ناصري رسنیو ته وويل، دغه اووه کسيزه ډله يې د غزني - کابل د لويې لارې په اوږدو کې نیولي ده.
ناصري زیاته کړه:
"دغو پولیسو په زنخان ولسوالۍ کې وظیفه درلوده او دوه ورځې وړاندي د غزني له مرکز سره اړوندې روضې په سیمه کې د پولیسو مدیریت کارکوونکو نیولي دي."
ښاغلی ناصري وايي، له دغو کسانو سره هغه وسایل او پیسې هم نيول شوي چې له خلکو يې اخېستې وې.
د ده په خبره دغو کسانو پر خپلو جرمونو اعتراف کړی او دوسیې يې د غزني ولایت څارنوالۍ ته لېږل شوي دي.