د کابل ولایت پولیسو تر لسو کیلو ګرامو ډېر نشه يي مواد له څلورو کسانو سره یو ځای نیولي دي.
د کابل ښار د دروازو د کنټرول قوماندان فریدون بختیار رسنیو ته وویل، په لومړۍ پېښه کې په ارغندۍ چوک کې دوه تنه هغه مهال ونیول شول چې غوښتل یې ۱۰کیلو ګرامه هیرویین له یوه ګاونډي ولایت څخه کابل ته قاچاق کړي.
دغه ډول په دوهمه پېښه کې هم دوه تنه نیول شوي چې غوښتل یې درې کیلو ګرامه نشه يي مواد په کرولا موټر کې کابل ته قاچاق کړي.
په تېرو درېیو اونیو کې دا څلورم ځل دی چې د کابل پولیس نشه يي مواد او قاچاق کوونکي په داسې حال کې نیسي چې غوښتل يې نشه يي مواد له ګاونډیو ولایتونو څخه کابل ته قاچاق کړي.