د افغانستان د بهرنیو چارو وزارت وايي، له روسیې سره په مسکو کې د افغانستان د سولې په اړه د غونډې پر جزئیاتو لا موافقې ته نهدي رسېدلي.
د بهرنیو چارو وزارت ویاند صبغت الله احمدي پرون شنبې ازادي راډیو ته وویل:
"زموږ خبرې لا جریان لري، موږ تر اوسه له روسیې سره پر دې چې د مسکو غونډه څه وخت او څرنګه وشي موافقه نهده کړې، زموږ بحثونه جریان لري."
د روسیې حکومت پرون، شنبه د نوومبر۳مه، وویل چې د افغانستان حکومت او طالبانو موافقه کړې چې په مسکو کې به د افغانستان د سولې په اړه په را روانه غونډه کې ګډون وکړي.
د روسیې د بهرنیو چارو وزارت په یوه بیان کې وویل چې د افغانستان د سولې د عالي شورا او په قطر کې د طالبانو د سیاسي دفتر پلاوي به مسکو ته ورشي.
په بیان کې ویل شوي چې دا به د طالبانو د سیاسي دفتر د غړو اول وار وي چې په دومره لوړه کچه غونډه کې برخه اخلي.
روسیې ویلي چې دا غونډه د نوومبر په ۹مه، جوړېږي.