د کرنې او اوبو لګونې وزارت وایی، روانه اوونۍ به د افغانستان له لوري چین ته د تورو جلغوزيو د لېږد لړۍ پیل کړي.
د کرنې وزارت ویاند اکبر رستمي نن شنبه ازادي راډیو ته وویل چې له دې وړاندې به جلغوزي په قاچاقي ډول نورو هېوادونو ته انتقالېدل چې په کلني ډول یې څلور نیم سوه میلیونه ډالر عاید درلودل، خو له دې وروسته به په هغه صورت کې چې جلغوزي خپله په افغانستان کې پروسس او له قانوني لارې صادر شي، په کلني ډول به یو میلیارد ډالر ګټه وکړي.
دی وایي، افغانستان په کلني ډول ۲۳ زره ټنه د نړې په کچه تر ټولو ښه او کیفیت لرونکي جلغوزي تولیدوي چې نړیوال بازار هم لري.