ملګروملتونو پهدې اړه څېړنې پیل کړي چې ایا هغه وسلې چې د امریکا سمندري ځواکونو په خلیج کې موندلې دي، ایران یمن ته استولې که نه؟
که څه هم معلومه نهده چې دا وسلې به حتماً ایران استولې وي، خو ملګرو ملتونو او متحدایالاتو له دې مخکې هم د یمن حوثي یاغیانو ته د وسلو د استولو تور پر ایران لګولی و.
امریکايي چارواکو د پنجشنبې په ورځ د ملګرو ملتونو مفتشانو ته بلنه ورکړه چې معلومه کړي چې ایا د متحدایالاتو د سمندري ځواکونو لهخوا په خلیج کې موندل شوې وسلې به د یمن حوثي یاغیانو ته د ایران لهخوا د قاچاقي وسلو د استولو شواهد په لاس ورکړي کهنه؟
د ملګروملتونو څېړونکو پهدې لړ کې د هغو څه باندې ۲۵۰۰ کلاشینکوفونو او د وسلو د نورو ډولونو معاینه پیل کړې ده چې د امریکا سمندري ځواکونو د یمن سواحلو ته نژدې موندلې دي.
د دوی د څېړنو هدف د دې حقیقت روښانه کول دي چې ایا دا وسلې له ایرانه استول شوي که له سومالیا څخه؟
په سیمه کې د امریکا د سمندري ځواکونو یوه قوماندان اډمېرال سکات سټرني Scott Stearney پرون پنجشنبې خبریالانو ته وویل چې د عدن په خلیج او د یمن په اوبو کې د وسلو د قاچاق یو ډېر لوی دهلېز شته.
سټرني پهدې اړه چې ایا دا وسلې ایران یمن ته استولي له څه ویلو ډډه وکړه، خو هغه تأیید کړه چې د دې وسلو د تفتیش لپاره د ملګروملتونو مؤظف څېړونکي د ایران، یمن او سومالیا د وسلو متخصصان دي.
ملګروملتونو په وار- وار تور لګولی چې ایران له غیرقانوني لارو یمن ته د وسلو په استولو سره حوثي یاغیانو ته د وسلو پر ورکولو د بندیز له پریکړهلیکه سرغړونه کوي، خو له دې سره- سره د امریکا سمندري ځواکونه- چې د یمن په شاوخوا اوبو کې ګزمې کوي حوثیانو ته د وسلو د قاچاق یوازې د ګوتو په شمار موارد موندلي دي. پهدې لړ کې وروستی مورد د اګسټ په وروستیو کې د وسلو د یوې زېرمې موندل و چې د ملګروملتونو مفتشان یې اوس لیدو ته ورغلي دي.
د وسلو دا لویه بسته د امریکا سمندري ځواکونو په خلیج کې د ګزمې پرمهال وموندله. د امریکا د سمندري ځواکونو چارواکي وايي، دا وسلې یې د یمن د سواحلو په ۷۰ کیلومترۍ کې له یوې کشتۍ څخه یوې بلې کوچنۍ کشتۍ د کښته کولو پرمهال ولیدلې.
دوی زیاتوي چې سرتېرو دا کشتۍ ودروله او د هغې له عملې سره تر خبرو وروسته ورته معلومه شوه چې د وسلو قاچاقبران دي. د امریکا د سمندري ځواکونو یوه قوماندان وویل چې دا وسلې په پلاستیک کې تاو او په شنو بوجیو کې ځای پرځای شوې وې.
د امریکا د سمندري ځواکونو یو بل افسر ویلي، ډېر احتمال شته چې دا وسلې به له ایرانه نه بلکې له سومالیا څخه یمن ته قاچاق کېدلې، خو دا افسر زیاتوي چې د ملګروملتونو د څارونکو له پلټنو وروسته به وروستۍ نتیجه معلومه شي.