د پنجشنبې په ورځ په خوست کې د ولسي جرګې ۲۵ نوماندانو او یو شمېر قومي مشرانو او دیني عالمانو د یوې خبري ناستې پر مهال د افغانستان د ټاکنو او شکایاتو له خپلواکو کمېسیونونو غوښتنه وکړه چې په یاد ولایت کې دې د ولسي جرګې په ټاکنو کې یوازې هغه رأيې وشمېرل شي چې د بایومټریک له لارې کارول شوي وي.
دوی ویل، د ټاکنو په ورځ د یو شمېر نوماندانو لهخوا بایومټریک ماشینونه په پلان شوي بڼه خراب ښودل کېدل او لهدې موقع څخه په ګټه يې په درغلیو لسګونه صندوقونه ډک کړي دي.
معترضو نوماندانو ګواښ وکړ، که د ټاکنو او شکایاتو خپلواک کمېسیونونه د دوی غوښتنې په پام کې ونه نیسي، نو پایلې به يې د دوی لپاره د منلو وړ نهوي او په مدني حرکتونه به لاس پورې کړي.
په خبري ناسته کې د ولسي جرګې یو تن نوماند حفیظ الله صبري وویل، هغه رأيې چې بایو مټریک نهوي دوی يې منلو ته تیار نهدي.
ده غوښتنه وکړه چې په صندوقونو کې شته رأيې دې، د ملي او نړیوالو ناظرینو په مخکې بیا ځل وشمېرل شي.
د ولسي جرګې یو بل تن نوماند عبدالولي واحدزی وايي، په تڼیو، سپېره، اسماعېل خېلو او مندوزيو، صبریو، باک، علي شیرو حتی د ځاځي میدان په ځینو سیمو کې بایومټریک سیستم نه دی کارول شوی او په مهندسي شوي شکل دا سیستم غیر فعال ښودل شوی دی.
عبدالولي واحدزی
په خبري کنفرانس کې د ولسي جرګې د نوماند امیر بهیر لهخوا د نوماندانو څلور مادهییز پرېکړهلیک هم ولوستل شو چې پهکې غوښتنه شوې، له بایو مټریک پرته ټولې رأيې دې باطلې اعلان شي.
په پرېکړه لیک کې راغلي چې د عدالت او شفافیت د تامین په موخه دې په ټولو ټاکنیزو مرکزونو کې کارول شوې رأيې، د نوماندانو، داخلي او بهرنیو ناظرنانو پر وړاندې د بیا ځل لپاره وشمېرل شي.
معترضو نوماندانو په پرېکړه لیک کې دا غوښتنه هم کړې،هغه کسان چې د درغلیو په موخه يې د ټاکنو په بهیر کې مداخلې کړي، د تحقیقاتو لپاره دې عدلي او قضايي ادارو ته ور وپېژندل شي.
بل ځای په ورته توګه د یووالي او بدلون کاروان د بنسټ په انګړ کې هم د ګڼو دیني عالمانو او قومي مخورو په ګډون غونډه جوړه شوې وه، هغوی هم ویل چې په ټاکنو کې دې یوازې د بایومټریک له لارې کارول شوې رأيې وشمېرل شي.
مولوي ولیدګل وویل ځینې خلک په ساعتونو رأی اچونې ته په لیکو کې متنظر ولاړ ول، خو ځینونوماندانو بیا د درغلیو له لارې صندوقونه ډک کړي دي.
ده ګواښ وکړ، که د ټاکنو کمېسیون هغه رأيې چې بایومټریک نه دي وشمېري، نو د راتلونکو ولسمشریزو او ولایتي شورا د ټاکنو پر مهال به د منبر له لارې پر خلکو غږ وکړي چې ستاسو رأيې ځای نه نیسي.
مولوي ولیدګل
په خوست کې د ولسي جرګې نوماندانو داسې مهال په ټاکنو کې په کارول شویو رایو کې د شفافیت د تامین غوښتنه کړې چې د انتخاباتو خپلواک کمېسیون یو ځل بیا ډاډ ورکړ چې رأی شمېرنه به په شفاف اوجدي ډول ترسره شي.
د دغه کمېسیون مشر ګلا جان عبدالبدیع صیاد په همدې ورځ په یوه خبري غونډه کې وویل چې هڅه کوي تورې او سپینې رأیې سره بیلې کړي.
د انتخاباتو د خپلواک کمېسیون د مسؤلینو په خبره د افغانستان د ولسي جرګې په ټولټاکنو کې شااوخوا څلور میلیونه کسانو خپلې رأیې کارولي دي.
راپور: نجیب الله الوخېل