سعودي عربستان وايي، دوی به د هر ډول هغو بندیزونو په وړاندې ځواب ووايي چې که پر دې هېواد د ژورنالېست جمال خاشقجي د ورکېدو له کبله ولګول شي.
ترکي چارواکي ګومان کوي چې خاشقجي به تېره اوونۍ په استانبول کې د سعودي په کنسولګرۍ کې وژل شوی وی.
د سعودي دولتي خبري اژانس د یوې داسې سعودي چارواکې له خولې چې نوم یې نهدی یاد شوی ویلي چې سعودي سلطنت به پهدې اړه د هر ډول ګواښونو ځواب ووايي، هغه که اقتصادي بندیزونه وي او که سیاسي فشار وي.
د سعودي چارواکو دا بیان داسې وخت خپریږي چې د امریکا ولسمشر ډونالډ ټرمپ ویلي، که څرګنده شي چې سعودي د خاشقجي په تري تم کېدو او مشکوک قتل کې لاس ولري دا هېواد به له جدي عواقبو سره مخ شي.
جمال خاشقجي یو سعودي ژورنالېست و چې د سعودي پر ولیعهد محمد بن سلمان یې انتقادي لیکنې خپرولې.
سعودي سلطنت، د خاشقجي په قتل کې د لاس لرلو ادعاوې بې بنسټه بللي، خو داسې هېڅ ثبوت یې نهدی وړاندې کړی چې وښيې په استانبول کې د دې هېواد کنسولګرۍ ته د اکټوبر په دوهمه نېټه ورغلی خاشقجي دې بېرته ژوندۍ له کنسولګرۍ وتلی وي.