په سپینبولدک کې د افغان او پاکستاني پوله ساتو ترمنځ له څو ساعته جګړې وروسته پاکستاني چارواکو دغلته د اغزن سیم د غځولو کار ودرولی دی.
جنوب کې د ۲۰۵ اتل قول اردو ویاند تورن احمد صادق عيسي وايي چې تېره ورځ د کندهار د سپينبولدک او ښورابک ولسوالیو د سروڅاهانو په سيمه کې د پاکستاني ځواکونو سره د افغان سرحدي ځواکونو له څو ساعته جګړې وروسته جګړه او سيمه کې د پاکستاني ځواکونو لهخوا د اغزن سیم د غځولو کار درېدلی او سيمې ته اضافي ځواکونه هم لېږل شوي دي.
عيسي وویل چې افغان امنیتي ځواکونه دا مهال د تيار سئ په حال کې دي:
"تقریباً اته ساعته هلته جګړه روانه او اوس پرته له تلفاتو جګړه پای ته رسېدلې او په سیمه کې د پاکستاني لورې لهخوا د اغزن تار د غزولو چارې هم ځنډېدلي دي. اوس سیمه کې جګړه نهشته."
پاکستان له دغه جګړې وروسته په سمدستي توګه په سپينبولدک ولسوالۍ کې د دوستۍ دروازه هم د تګ راتګ پر مخ وتړله.
تراوسه پاکستاني لوري د جګړې په تړاو تبصره نهده کړې.