د افغانستان د انتخاباتو خپلواک کمېسیون وايي چې له کابل زون څخه پرته ټولو ولایتونو ته حساس او غیر حساس انتخاباتي مواد رسېدلي.
د ولسي جرګې انتخاباتو ته اته ورځې پاتې دي، د انتخاباتو خپلواک کمېسیون وايي چې دغو انتخاباتو ته چمتوالی نېږدې په بشپړېدو دی.
د دغه کمېسیون منشي او ویاند سید حفیظ الله هاشمي د جمعې په ورځ ازادي راډیو ته وویل چې د نن ورځې تر پایه به ټو ولایتونو ته د انتخاباتي حساس او غیر حساس موادو د لېږد لړۍ بشپړه شي.
سید حفیظ الله هاشمي
ښاغلي هاشمي زیاته کړه:
"د کابل له زونه پرته ټولو ولایتونو ته حساس او غیر حساس مواد رسېدلي او کابل زون ته به هم نن ورسېږي، همداشان د میزان په ۱۷ ولسوالیو ته انتخاباتي موادو انتقال لړۍ پیل شوې چې د میزان تر ۲۷مې به ټولو انتخاباتي مرکزونو ته ورسېږي."
د افغانستان د ولسي جرګې انتخابات د روانې میزان میاشتې په ۲۸ مه ترسره کېږي چې دا مهال ورته له غزني ولایت پرته په ټول افغانستان د ۲۵۶۵ کاندیدانو ترمنځ انتخاباتي سیالۍ روانې دي.
افغانستان لپاره د ملګرو ملتونو ځانګړي استازي تدامیچي یاماموتو ویلي چې افغانان باید ونه ګواښل شي چې د خپلو استازو د غوره کولو لپاره له دغې پروسې څخه بې برخې کړای شي.
د افغانستان د ازادو او عادلانه انتخاباتو بنسټ یا فیفا ولایتونو ته د انتخاباتي حساسو او غیر حساسو موادو له رسېدو د هرکلي ترڅنګ د دغو موادو د خوندي ساتنې په اړه اندېښمن دی.
د یاد بنسټ اجرائیوي مشر یوسف رشید وايي، که دغه مواد په لېرو پرتو ولسوالیو او سیمو کې د کوم کاندید او یا د هغوی پلویانو ته په لاس ورشي ممکن درغلي ته د لارې هوارولو لپاره تخریب شي.
یوسف رشید
ښاغلي رشید زیاته کړه:
"له موادو باید ښه ساتنه وشي، موږ اندېښمن یو کله چې مواد ولسوالیو او یا هم انتخاباتي مرکزونو ته رسېږي، ممکن دغه مواد د کاندیدانو، د هغوی پلویانو او هم د هغو زورواکو لاس ته چې د ځانګړي کاندید ملاتړ کوي ونه لویږي او لهمنځه یو نه وړل شي."
خو د افغانستان دفاعي ارګانونه وايي چې له انتخاباتي کمېسیونونو سره یوځای د انتخاباتي مواد د لېږد او ساتنې لپاره یو مکانېزم جوړ کړی چې له مخې به یې حساس او غیر حساس انتخاباتي مواد خوندي وساتل شي.
په ورته وخت کې د اسلامي همکاریو سازمان ویلي چې دغه سازمان په ټول قوت د افغانستان د انتخاباتو له بهیره ملاتړ کوي.
بلخوا وسله والو طالبانو په یوه اعلامیه کې د ولسي جرګې انتخاباتو د ګډوډولو ګواښ کړی.
یوناما ویلي د افغانستان امنیتي ځواکونه بشپړ مسوول دي چې د انتخاباتو لپاره امنیت برابر کړي.
د افغانستان د کورنیو چارو وزارت د دې انتخاباتو د امنیت په برخه کې ډاډ ورکوي او څرګندوي چې امنیتي ځواکونه به طالبانو ته اجازه ورنهکړي چې انتخابات ګډوډ کړي.
راپور: رحمتالله افغان