د افغانستان د انتخاباتو خپلواک کمېسیون وايي، ولسي جرګې ته د کاندیدانو له موجوده شمېرې شااوخوا ۱۹۲يې په ګوندونو پورې اړه لري.
دغه کمېسیون وايي، د ولسي جرګې ۲۴۹ څوکیو ته له ۲۵۵۶ ولاړو کاندیدانو یوازې نږدې ۲۰۰ کسان داسې دي چې د دوی د موندنو له مخې، په ګوندونو پورې اړه لري.
د یاد کمېسیون ویاند او کمېشنر سید حفیظالله هاشمي د یکشنبې په ورځ «۱۳۹۷ کال د تلې ۱۵» ازادي راډيو ته وویل، کمېسیون د ګوندونو او سیاسي جریانونو د وړاندیزونو او څارنې په برخه کې ونډې ته د درناوي په نظر ګوري.
سید حفیظ الله هاشمي
دی وایي:
"د ګوندي کاندیدانو شمېر شاید زیات وي، خو ډېرو کاندیدانو خپل ځانونه خپلواک ښودلي، په ټوله کې په ۲۵۵۶ کسانو کې چې موږ د ګوندونو په نوم څوک پیدا کړي، هغه ۱۹۲ کاندیدان دي."
دا په داسې حال کې ده چې له دې وړاندې د سترو سیاسي ګوندونو لهخوا تل د ګوندي انتخاباتو او په انتخاباتو کې د دوی د فعاله ونډې غوښتنه بیا بیا مطرح شوې ده.
د انتخاباتو خپلواک کمېسیون دا هم وايي چې ممکن د ګوندونو او سیاسي جریانونو لهخوا د کاندیدانو شمېره لوړه وي، خو ډېرو کاندیدانو په دغه بهیر کې خپل ځانونه خپلواک نومولي دي.
په افغانستان کې د ولسي جرګې د انتخاباتو په لړ کې سیاسي ګوندونو غوښتنه کوله چې د انتخاباتو بهیر باید بایو مټریک وي، سیاسي ګوندونو او ائتلافونو ته دې د څار د بشپړې زمینې د برابرولو تر څنګ، په انتخاباتو کې د ګوندونو ونډه ډېره شي.
دا ګوندونه اوس په ملي ائتلاف کې سره راغونډ شوي چې په وینا يې، ۳۵ ګوندونه د دوی د دغو غوښتنو ملاتړ کوي.
د ملي ائتلاف یوه ویاند فضلالرحمان اوریا ازادي راډیو ته وویل، د راتلونکو انتخاباتو په اړه د دوی دوه غوښتنې منل شوي او په راتلونکي کې به د ګوندونو ونډې ته هم پام وشي.
فضل الرحمان اوریا
نوموړي وویل:
"د سیاسي ګوندونو او ائتلافونو غوښتنه دا وه چې سیاسي ګوندونه او ائتلافونه په انتخاباتو کې بشپړ ګډون ولري او خپل نوماندان د ګوند له لارې معرفي کړي، خو له بده مرغه حکومت زموږ غوښتنې ته په دې اړه مثبت ځواب ورنهکړ، نو د انتخاباتو په اوسني بهیر کې خپلواک او انفرادي نوماندان شتون لري او ګوندونه په رسمي ډول پهکې شامل نهدي."
دی وايي، له دې سره ګوندونه غواړي چې د میزان د ۲۸مې له انتخاباتو به نږدې څارنه وکړي.
د ښاغلي اوریا په خبره، تر ډېره خپلواک نوماندان هم د بېلابېلو سیاسي جریانونو ملاتړ لري چې په ولسي جرګه کې به بیا د خلکو تر څنګ، د دوی استازیتوب هم کوي.
د سیاسي چارو کارپوه حکمتالله حکمت وايي، په پټه کې ډېر ګوندونه د ځينو کاندیدانو تر شا ولاړ دي، خو پر ګوندونو د خلکو بېباوري او له حکومت سره د ګوندونو ټکر د دې لامل شوی چې دغه بهیر تر ډېره خپلواک رنګ ولري.
راپور: یوسف خان ځدراڼ