کابل چاپ ورځپاڼو په خپلو نننیو ګڼو کې تر ډېره د افغانستان د ولسي جرګې د انتخاباتو په اړه لیکنې او سرلیکنې چاپ کړي دي.
- ملي ارمان
ملي ارمان خپلواکې ورځپاڼې لیکلي، که بېړه ونهشي انتخابات به په خپل ټاکلي وخت یعنې د میزان د میاشتې په ۲۸مه نېټه ترسره نهشي.
شپږلکه د نوملېکنې تکراري پاڼې پېژندل شوي.
په سرمقاله کې راغلي چې د رأیو ورکوونکو د نوملېکنې د بهیر له پیله په پایتخت او ولایتونو کې د پراخو درغلیو نمونې لیدل شوي چې د ټول افغانستان خلک یې له امله انتقادونه لري.
ورځپاڼې وړاندې لیکلي:
د افغانستان د انتخاباتو خپلواک کمېسیون اعلان کړی چې شپږلکه د نوملېکنې تکراري پاڼې پېژندل شوي او دا یې د رأیو ورکوونکو له شمېره ایستي دي.
د دغه کمېسیون د معلوماتو له مخې له اتو میلیونو ډېرو رأیو ورکوونکو د افغانستان د ولسي جرګې د سږنیو انتخاباتو لپاره نوملېکنه کړې ده.
د سرمقالې لیکوال دا هم لیکي چې دا د نوملېکنې په بهیر کې د درغلیو یوه وړه برخه ده.
ولایتونو کې د پراخو درغلیو نمونې لیدل شوي.
د سرمقالې په وروستۍ برخه کې راغلي، د ولسي جرګې انتخاباتو ته له ۲۰ کمې ورځې پاتې دي او که دا ورځې د بایومټریک سیسټم لپاره د دستګاهګانو د برابرولو، فعالولو او ولایتونو تهیې د لېږد لپاره کمې وي، ښايي انتخابات په خپلو وخت ترسره نهشي او که شي هم راڼه به نهوي.
- انیس
انیس دولتي ورځپاڼې بیا په انتخاباتو کې د رسنیو د رول په اړه په خپله سرمقاله کې لیکلي دي.
انیس په انتخاباتو کې د رسنیو رول په ټوله کې مهم بللی دی په ځانګړي ډول په یاده پروسه د خلکو د باور په برخه کې.
ورځپانې دا هم لیکلي چې د کاندیدانو انتخاباتي کمپاینونه او په ورته وخت کې د دوی په اړه خلکو ته د رسنیو لهخوا عامه پوهاوی دا د خلکو ذهنونه روښانه کوي او د دوی د انتخاب په برخه کې ورسره مرسته کوي.
په انتخاباتو کې د رسنیو رول په ټوله کې مهم بلل شوی.
ویسا
ویسا خپلواکې ورځپاڼې په خپل یو مطلب کې لیکلي چې د افغانستان لپاره د ډیموکراسۍ موسسه ځوانو کاندیدانو سره مالي مرسته کوي.
ورځپاڼې لیکلي چې دغه موسسه له هرکاندید سره چې د دوی لهخوا ټاکل کېږي له ۲۵ تر ۳۰ زرو ډالرو پورې مرسته کوي.
ورځپاڼې د ولسي جرګې د یو شمېر غړو په حواله دا خبره کړې او لیکلي یې دي چې دغه موسسه د دې لپاره چې یو شمېر کاندیدان بریالي کړي ورسره همکاري کوي او د کمپاینونو لګښتونه یې ورکوي.