د بریتانیا څارنوالانو د دوو روسي وګړو پر وړاندې تورونه اعلان کړل چې د دوی په باور، د یوه پخواني روسي جاسوس سرګي سکریپال او د هغه د لور د مسمومولو په قضیه کې ښکېل دي.
دغو څارنوالانو د تورنو کسانو انځورونه هم خپاره کړل.
د بریتانیا د سلطنتي څارنوالۍ د حقوقي خدماتو مشرې سو هیمینګ د چهارشنبې په ورځ په لندن کې یوې خبري غونډې ته وویل:
"د بریتانیا سلطنتي څارنوالۍ د ترورېزم ضد څانګې شواهد ارزولي او نتیجه یې اخيستې چې د دې جرم د ثابتولو لپاره کافي اسناد شته او دا په ښکاره ډول د خلکو په ګټه ده چې الکساندر پټروف او رسلان بوشیروف چې روسي اتباع دي، په داسې کړنو تورن شي چې په هغه کې د سرګي سکریپال د وژلو پلان، د سرګي او یولیا سکریپال او هم د یوه برتانوي پولیس افسر نیک بیلي د قتل هڅه او د کیمیاوي وسلو د قانون پر خلاف د نوویچاک په نوم کیمیاوي موادو درلودل او کارول شامل دي."
په اروپا کې ددغو دوو روسانو د نیول کېدو حکم صادر شوی دی.
سرګي او یولیا سکریپال د روان کال د مارچ په څلورمه د بریتانیا په سیلسبوري ښار کې مسموم شول.
د بریتانیا پولیس وایي، دواړو تورنو کسانو تر دې پېښې دوه ورځې دمخه په روسي پاسپورټ له مسکو څخه لندن ته سفر کړی و.
د بریتانيا صدراعظمې تریزا مې هم وایي، د دوی استخباراتي معلومات ښیې چې د سرګي او یولیا سکریپال په مسمومولو مشکوک کسان د روسیې د پوځ د استخباراتو د ادارې افسران دي.
مسکو په دې قضیه کې د روسیې لاس لرل رد کړي دي.