د ملي وحدت حکومت اجرائیه رئیس د مسکو غونډې ته په اشارې سره وايي چې د افغانستان د سولې لپاره د ټولو هېوادونو له هڅو هرکلی کوي، خو په وینا یې د سولې د پروسې مالکیت باید افغانستان وکړي.
په داسې حال کې چې ټاکل شوې مسکو تر راتلونکو څو ورځو پورې د طالبانو په استازیتوب د افغانستان د سولې په اړه د یوې غوڼدې کوربه وي، د ملي وحدت حکومت اجرائیه رئیس وايي، د سولې د پروسې حاکمیت باید د افغانستان له خلکو او حکومت سره وي.
عبدالله عبدالله د دوشنبې په ورځ «۰۵ سنبله ۱۳۹۷» د وزیرانو شورا له غونډې مخکې رسنیو سره په خبرو کې وویل چې د اف
غانستان د سولې پروسه باید افغانان رهبري کړي او د مسکو ناسته چې روسیهیې مشري کوي، کومه نتیجه به ورنهکړي.
اجرائیه رئیس عبدالله عبدالله
نوموړي زیاته کړه:
"کوم هېوادونه چې د افغانستان د سولې لپاره زمینه برابروي او همکاري کوي، موږ ترې هرکلی کوو، خو د یوې شېبې او حتی یو ځل لپاره هم باید د سولې پروسې حاکمیت تر پوښتنې لاندې رانهشي، دا حاکمیت باید د افغانستان له خلکو او حکومت سره وي او د دې پروسې رهبري باید افغانستان وکړي، ځکه د سولې د ټینګښت اړتیا تر ټولو مخکې افغانان احساسوي."
ټاکل شوې چې د افغانستان د سولې په اړه د مسکو ناسته د راتلونکي میلادي میاشتې په څلورمه نېټه د روسیې په کوربهتوب جوړه شي.
طالبانو هم منلې چې د دغې ډلې په استازیتوب به په قطر کې د دوی له سیاسي دفتره یو پلاوی په دغه غونډه کې ګډون وکړي.
خو افغان حکومت ویلي چې د مسکو په ناسته کې چې د افغان سولې په اړه د روسیې په کوربهتوب جوړېږي، برخه نهاخلي.
د امریکا متحده ایالاتو هم د مسکو په ناسته کې د روسیې بلنه نهده منلې او ویلي یې دي چې د افغانستان د سولې خبرې باید د افغانانو په مشرۍ تر سره شي.
مخکې تر دې د طالبانو یو شمېر استازو په قطر کې له یو شمېر امریکايي چارواکو سره هم کتلي چې دغه لیدنې کتنې تأیید شوې هم دي، خو افغان حکومت ویلي چې دا خبرې رسمي نهدي او دا د حکومت او طالبانو ترمنځ د سولې خبرو ته زمینه برابروي.
په ورته وخت کې افغان سناتور نادر بلوڅ وايي، افغان حکومت او د سولې عالي شورا نهدي توانېدلي چې طالبان بینالافغاني سولې ته راوبولي، نو ځکه یو شمېر هېوادونه په دا شان اقداماتو لاس پورې کوي
دی وایي:
"افغان دولت د سقوط په سره کرښه کې دی، همدا وجه ده چې د سیمې د هېوادونو دا جرأت پیاوړی شوی چې د عمل ابتکار په خپل لاس کې واخلي او د افغانستان د کړکېچ لپاره عملي ګامونه پورته کړي."
که څه هم افغان حکومت تل په بینالاافغاني خبرو ټینګار کړی، خو طالبانو بیا ویلي چې نهغواړي چې له افغان حکومت سره خبرې وکړي، بلکې دغې ډلې د امریکا له متحده ایالاتو سره په مخامخ خبرو ټینګار کړی دی.
راپور: ناجیه ساپۍ