د کابل چاپ په نننیو ورځپاڼو کې د سیاسي، اقتصادي، امنیتي او ټولنیزو موضوعاتو تر څنګ په راتلونکو انتخاباتو او په ځانګړي ډول په پروسه کې د حکومت د ملکي او پوځي چارواکو د نهمداخلې په اړه د ولسمشر په فرمان بحثونه کړي دي.
- ماندګار
ماندګار ورځپاڼې پهدې اړه په خپل لومړي مخ په یو مطلب کې لیکلي دي چې دغه څلور مادهییز فرمان له سیاسي رهبرانو سره تر لیدنې وروسته د افغان ولسمشر له لوري صادر شو.
د مطلب په دوام راغلي چې د دغه فرمان له مخې هېڅڅوک حق نهلري چې د ولسي جرګې او ولسوالیو شوراګانو په راتلونکو انتخاباتو کې لاسوهنه وکړي.
ورځپاڼې د ولسمشر د ویاند هارون چخانسوري له قوله لیکلي دي چې د ولسمشر او سیاسي رهبرانو لیدنه د انتخاباتي ټکټ د جوړېدو نه، بلکې د مشورو اخیستو په هدف جوړه شوې وه.
په مطلب کې د ښاغلي چخانسوري له قوله وړاندې راغلي دي چې پهدې ناسته کې په درېیو مهمو مسایلو انتخابات، تلپاتي اوربند او په حکومتدارۍ کې په اصلاحاتو بحثونه وشول.
خلک او سیاسي احزاب له حکومته د شفافو او عادلانه انتخاباتو غوښتونکي دي.
- مدنیت
مدنیت ورځپاڼې بیا پهدې اړه لیکلي دي چې د ښه انتخاباتو د ترسره کېدو په هدف یوازې فرمان بسنه نهکوي.
ورځپاڼې وړاندې لیکلي دي چې په ټوله نړۍ کې انتخابات یوه مهمه سیاسي پروسه ده، خو په افغانستان کې دغه پروسه د نازک سیاسي وضعیت له امله کړکېچنه شوې ده.
ورځپاڼې لیکلي دي چې خلک او سیاسي احزاب له حکومته د شفافو او عادلانه انتخاباتو غوښتونکي دي.
د مطلب په دوام راغلي دي چې د انتخاباتو په اړه د سیاسي احزابو مسلسلې ناستې او په برښنايي شکل د انتخاباتو په ترسره کېدو ټینګار دا په ډاګه کوي چې دغه سیاسي ډلې د انتخاباتو د شفافیت په اړه اندېښنې لري.
ورځپانې لیکلي چې دا یوازې د حکومت مداخلې او لاسوهنې نهدي چې اندېښنې یې پیدا کړي، بلکې پهخپله دغو سیاسي ګوندونو، زورواکو او سیمهییزو قوماندانانو هم انتخابات له ګواښ سره مخامخ کړي دي.
د مطلب په پای کې که څه هم په انتخاباتو کې د امنيتي ځواکونو د نهمداخلې په اړه د ولسمشر محمد اشرف غني فرمان مثبت ګام بلل شوی، خو ټینګار شوی چې یوازې دغه فرمان بسنه نهکوي او د ښه انتخاباتو د ترسره کېدو لپاره سیاسي اراده حتمي ده.
- انیس
انیس دولتي ورځپانې هم د همدې موضوع په اړه په خپاره شوي مطلب کې ویلي چې ولسمشر محمد اشرف غني په جدي توګه سپارښتنه وکړه چې دولتي مأمورین او حکومتي بنسټونه باید د انتخاباتو په بهیر کې مداخله ونهکړي.
ورځپاڼې د ولسمشر د ویاند هغه خبره راخیستې چې انتخابات به په خپل وخت وشي او ولسمشر پهدې اړه جدي دی.
وړاندې په مقاله کې د ولسمشر د ویاند هارون چخانسوري له قوله ویل شوي چې دا به لومړی ځل وي چې د افغانستان د جمهوري ریاست انتخابات به په هغه ډول چې په اساسي قانون کې یې وړاندوینه شوې ده، ترسره شي.