کابل چاپ ورځپاڼو په خپلو نننیو ګڼو کې پر بېلابېلو موضوعاتو لیکنې او سرلیکنې چاپ کړي دي.
- ویسا
ویسا خپلواکې ورځپاڼې په خپله سرمقاله کې لیکلي، ولس ته لومړیتوب څه شی دی؟!
په سرمقاله کې راغلي، زموږ ځیني ښاغلي شفاف انتخابات د هېواد د ټولو ستونزو یوازینۍ حللاره ګني، ځینې نور سوله د ولس ستر ارمان او تر ټولو ستره اړتیا ګڼي او ځینې نور بیا فساد او درغلي د هېواد د ټولو ستونزو مور ګڼي.
د سرمقاله لیکونکي په خبره، په واقعیت کې دا ټول زموږ لپاره لومړیتوبونه دي، لوی ارمانونه دي او د یوې سوکاله راتلونکي اساسي توکي دي.
خو د ورځپاڼې په باور، د دې ټولو لپاره باید ډوه ټکي د هڅو محور وګرځي:
- په ولس کې د ملي یووالي د روحیې را ژوندي کول
- په پردیو د تړاو پر ځای د خودۍ «پرځان متکي کېدل» او غرور پالل.
- مسیر
مسیر خپلواکې ورځپاڼې بیا په خپله سرمقاله کې د انتخاباتو په اړه لیکلي دي.
ورځپانه لیکي، د انتخاباتي شکایتونو کمېسیون لا په رسمي ډول د کاندیدانو وروستۍ لېست نهدی اعلان کړی، خو ځینې رسنیو داسې راپورونه خپاره کړي چې نوموړي کمېسیون د ځینو کسانو نومونه له لېسته ایستلي دي، دغه شان ځینو ته یې جدي اخطار او ځیني ته هم عادي اخطار ورکړی دی.
د سرمقاله لیکونکي په باور، په خپرو شوېو نومونو کې تر ډېره د حکومت سیاسي مخالفین شامل دي او داسې ښکاري چې لومړني ګامونه سیاسي اخېستل شوي دي.
په سرمقاله کې وړاندې راغلي، د انتخاباتي شکایتونو د کمېسیون دنده ده چې د کاندیدانو په تړاو شکایتونه وڅېړي، خو د ورځپاڼې په حواله، دوی باید له هر ډول قومي، ژبنیو، سمتي او سیاسي تړاونو لېرې دا کار وکړي او پرې نهږدي چې سیاست او سیاسي لوبې پر انتخاباتو سیورۍ وغوړوي.
- انیس
انیس دولتي ورځپاڼې بیا په خپله سرمقاله کې د سولې په تړاو د امریکا او طالبانو ترمنځ د خبرو اترو په اړه لیکلي دي.
انیس لیکلي، دا خبرې نن سبا د سیمې او نړۍ د رسنیو د موضوعاتو په سر کې ځای لري.
په سرمقاله کې راغلي چې تازه د امت په نوم یوې پاکستانۍ ورځپاڼې پهدې اړه لیکلي چې امریکا او پاکستان اوس دې نتیجې ته رسېدلي چې په راتلونکو میاشتو کې په ترکیې، قطر او یا هم سعودي عربستان کې د طالبانو په استازولۍ سره خبرې وکړي.
خو انیس ټینګار کړی چې هر هېواد د افغانستان د سولې په اړه له کوم لوري سره خبرې کوي، افغانستان باید پهکې موجود او خبرې هم د افغانانو په مشرۍ تر سره شي.
ځکه د سرمقاله لیکونکي په باور، که حالت داسې وي، بیا د افغانستان ملی حاکمیت تر پوښتنې لاندې ځي.
- دنیا
دنیا خپلواکې ورځپاڼې بیا په خپله سرمقاله کې په افغانستان کې د فساد او بډو اخېستلو موضوع راخېستې ده.
ورځپاڼې لیکلي چې د افغانستان د شفافیت د څار بنسټ یوه تازه سروې ښيې چې په افغانستان کې فساد ۵۰ سلنه زیات شوی دی.
په سرمقاله کې وړاندې راغلي، په افغانستان کې له فساده انکار نهشي کېدای، ځکه دغه شومه پدیده له پخوا راهیسې په دغه هېواد کې موجوده ده، خو د سرمقاله لیکونکي په خبره، دا چې فساد دې تر پخوا ډېر شي، دا مسئله د اندېښنې وړ ده.