د دفاع وزارت وايي، پکتیا او ننګرهار ته یې پلاوي استولي، څو د هغو راپورونو څېړنه وکړي چې وايي، دغلته په هوايي بمباریو کې ولسي خلکو ته مرګ ژوبله اوښتې ده.
په تېرو دوو ورځو کې د سیمهییزو چارواکو او ځايي خلکو له قوله د پکتیا په زرمت او د ننګرهار د خوګیاڼو ولسوالیو کې د هوايي بمباریو له کبله د ولسي خلکو د مرګ ژوبلې راپورونه خپاره شول.
ولسمشر محمد اشرف غني د شنبې په ورځ په یوې اعلامیې کې د دواړو پېښو په اړه د تحقیقاتو سپارښتنه کړې.
د افغانستان د دفاع وزارت د ویاند د دفتر سرپرست جنرال محمد رادمنش وايي، د ولسمشر د لارښوونې سره سم دواړو سیمو ته څېړونکي پلاوي استول شوي دي.
نوموړی زیاتوي:
"د ولسمشر په حکم پلاوي تللي دي. تر اوسه په قرارګاو کې دی. باید له یو لړ تدابیرو سره د پېښو سیمو ته ورشي. نو دا پلاوي سیمو ته لا نهدي رسیدلي، خو څېړنې روانې دي."
ښاغلي رادمنش وویل، دا ډول عملیات ډېر کله نړیوال ځواکونه له افغان ځواکونو سره په هماهنګۍ کوي او هغوی هم ښايي پهدې اړه څېړنې وکړي.
د پکتیا په زرمت او د ننګرهار د خوګیاڼو ولسوالۍ په مېمله سیمو کې ځايي خلکو رسنیو ته ویلي چې دغلته هوايي بمباریو پر وسلهوالو سربېره ولسي خلکو ته مرګ ژوبله اړولې او د خلکو کورونه یې ویجاړ کړي دي.