کابل چاپ ورځپاڼو په خپلو نننیو ګڼو کې په جلالاباد کې په یوې انتحاري حمله کې د افغان هندوانو او سېکهانو د وژل کېدو په تړاو غبرګونونه راخیستي دي.
- ملي ارمان
ملي ارمان خپلواکې ورځپاڼې په خپل لومړي مخ کې لیکلي، په جلالاباد کې پر افغان هندوانو او سېکهانو تر انتحاري حملې وروسته افغان حکومت او هند غبرګون ښودلی او دا یې د بشریت په وړاندې لوی جنایت بللی دی.
په مطلب کې راغلي، ولسمشر غني په خپل تویټر پاڼه کې لیکلي، زړهیې د هغو کورنیو غم چې په دغې حمله کې یې عزیزان وژل شوي مات کړی دی.
ولسمشر لیکلي چې په دغه حمله کې د افغان هندوانو او سېکهانو وژل کېدو خواشینی کړی او له ډېریو هغو سرهیې پېژندل.
ورځپاڼې د حملې په تړاو د هند د صدارعظم نرېندرا مودي ټویټ هم راخیستی چې لیکلي یې دي، هېواد یې پهداسې حال کې چې افغانستان غمجن دی، چمتو دی چې د هغه هېواد له دولت او خلکو سره هر اړخیزه مرسته وکړي.
په مطلب کې هغو لیکنو ته هم اشاره شوې چې د ټولنیزو رسنیو یو شمېر کاروونکو د یادې حملې په غبرګون کړي او د وژل شویو له کورنیو سرهیې غمرازي ښودلې ده.
- دنیا
دنیا خپلواکې ورځپاڼې بیا په خپل یو مطلب کې لیکلي چې افغان پخواني ولسمشر حامد کرزي هم دغه حمله غندلې او ویلي یې چې په افغانستان کې د ترهګریزو بریدونو ترسره کوونکي هغه کسان په نښه کوي چې د افغانستان پالنې او افغانیت پالنې لپاره هڅې کوي.
ورځپاڼې په خپل یو مطلب کې لیکلي چې په هند کې د افغانستان سفیر شیدا محمد ابدالي د یادې حملې په تړاو ویلي، پر افغانستان او هند له یو ځایه ترورېستي حملې کېږي.
د نوموړي په حواله دا هم راغلي چې پهدغو دوو هېوادونو حملې د یادو هېوادونو له پولو هاخوا طرحه کېږي او تر ډېره پاکستاني طالبان، لشکر طیبه او جېش محمد ډلې کومې چې په پاکستان کې فعالې دي پهکې ښکېلې دي.
- ویسا
ویسا خپلواکې ورځپاڼې بیا لیکلي چې دا حمله اجرائیه رئیس عبدالله عبدالله هم غندلې ده، خو د مطلب لیکونکی لیکلي چې اجرائیه رئیس له دې خبر نهو چې د حملې مسؤلیت چا منلی دی.
- هېواد
هېواد دولتي ورځپاڼې هم په خپل یو مطلب کې لیکلي چې افغان حکومت او ولس په جلالاباد کې پر افغان سېکهانو او هندوانو حملې اندېښمن کړي دي.
هېواد وړاندې په خپل دغه مطلب کې لیکلي، داعش ډلې د دغې حملې مسؤلیت پر ځان منلی او د مطلب د لیکونکي په وینا دا هغه ډله ده چې پاکستان روزلې او په افغانستان کې یې د خپلو ناوړو هدفونو، د قومونو ترمنځ تفرقې اچونې او تپل شوې جګړې د دوام لپاره کاروي.