د امریکا متحده ایالاتو د ملي امنیت سلاکار جان بولټون وايي، له روسیې سره د کریمیا د ناقانونه یوځای کېدو په اړهیې د روسیې له ولسمشر ولادیمیر پوتین سره خبرې کړې دي.
جان بولټون وايي، د روسیې ولسمشر تهیې ویلي چې د اوکراین په سر ورسره موافق نهدی.
هغه دا خبره پرون «سي. بي. اېس» ټلوېزیون ته وکړه.
جان بولټون چې د جون په ۲۷مه د روسیې له ولسمشر ولادیمیر پوتین سره لیدلي دا هم وویل چې امریکا د روسیې له خاورې سره د کریمیا د یوځای کېدو مخالفه ده.
د امریکا د ملي امنیت سلاکار ښاغلي بولټون له روسیې سره د کریمیا د خاورې د یوځای کېدو پر سر د امریکا د مخالفت د ختمولو احتمال رد کړ او ویېویل چې دا د امریکا دریځ نهدی.
هغه وویل، ولسمشر ټرمپ په بېلابېلو مسایلو له پوتین سره خبرې کوي او دا پهدې معنی ده چې هغه غواړي د نړۍ د بېلابېلو هېوادونو له مشرانو سره خبرې وکړي.
ښاغلي بولټون زیاته کړه:
"ولسمشر ټرمپ تېره اوونۍ وویل چې هغه به د اوکراین او سوریې په څېر په مسایلو بحث وکړي او نور ټول هغه مسایل چې زموږ «امریکا او روسیې» ترمنځ دي. زه فکر کوم د ولسمشر په باور دا ډېره مهمه ده ځکه دا یو فُرصت ورکوي چې ولسمشر ولادیمیر پوتین وارزوي او وګوري چې په کومو مسایلو موږ سره پرمختګ کولای شو او په کومو یې نهشو کولای."
تمه ده د امریکا ولسمشر ډونالد ټرمپ له خپل روسي سیال ولادیمیر پوتین سره د فنلند په مرکز هلسینکي کې د جولای په ۱۶مه وګوري.
ټرمپ وړمه ورځ د روسیې له خاورې سره د کریمیا د الحاق له رسمي پېژندنې ډډه وکړه.
ولسمشر ډونالد ټرمپ
کله چې د امریکا له ولسمشر ډونالد ټرمپ نه په ایر فورس ون یا د هغه په خاصه الوتکه کې وپوښتل شول چې د کریمیا د مسئلې په اړه د امریکا له اوږدمهالي مخالفت څخه به په شا شي ویېویل چې وبه ګوري.
ټرمپ دې پوښتنې ته هم ورته ځواب ورکړ چې ایا د کریمیا د الحاق په خاطر په روسیې د لګېدلو بندیزونو په لیرې کولو فکر کوي که څنګه؟
د روسیې د بهرنیو چارو وزیر سرګي لاوروف وړمه ورځ یعنې شنبه وویل چې ولسمشر ولادیمیر پوتین له ولسمشر ټرمپ سره په لیدنه کې پر روسیې د امریکا د بندیزونو مسئله نهمطرح کوي.
هغه دا هم وویل چې که امریکا دا بندیزونه لیرې کړي روسیه به ترې خوښه شي.
د امریکا متحده ایالاتو د دغه هېواد په انتخاباتو کې د روسیې د لاسوهنو د تورونو او هم د روسیې له خاورې سره د کریمیا د یوځای کېدو په خاطر په روسیې یو شمېر بندیزونه لګولي دي چې د دواړو هېوادونو ترمنځ د اړیکو د سړېدو عوامل یادېږي.
راپور: صفيالله ستانکزی