د هلمند د سولې کاروان وايي، د حکومت له لوري د اوربند ختمېدل، له دوی سره د شوې ژمنې خلاف کار دی.
افغان ولسمشر محمد اشرف غني د شنبې په ورځ رسماً د حکومت له لوري د اوربند پای اعلان کړ.
ولسمشر غني ټولو امنیتي ځواکونو ته اجازه ورکړه چې پوځي عملیات پېل کړي.
د دې ولسي حرکت ویاند بسم الله وطندوست پرون شنبه ازادي راډیو ته وویل:
"له موږ سره د یوې میاشتې یو طرفه اوربند ژمنه شوې وه، خو دولت بېرته له موږ سره خپله ژمنه ماته کړه."
د هلمند د سولې کاروان ویاند وویل چې دوی به وروسته پر دې مسئلې له رسنیو سره خبرې کوي.
وطندوست زیاته کړه چې د دوی حرکت د پنډېدو په حال کې دی او له بغلانه هم د ولسونو د سولې حرکت کابل ته روان شوی دی.