د افغان کډوالو د سولې کاروان نن جمعه له جلال اباده د کابل پر لور وخوځېد.
دغه کاروان د چهارشنبې په ورځ چې د جون شلمه او د کډوالو نړیواله ورځ وه، له پېښوره د کابل پر لور حرکت وکړ، پرون جلال اباد ته ورسېد او هلته یې له والي حیات الله حیات او نورو چارواکو سره ولیدل.
د افغان کډوالو د سولې د کاروان د رسنیو مسؤل جمیل خان عزیزي ازادي راډیو ته وویل چې د جګړې له ښکېلو خواوو د دوی غوښتنه د اوربند غځول او ورپسې د خبرو پیل دی.
نوموړي وویل:
"د کاروان د حرکت مقصد دا دی چې د جګړې له دواړو خواوو، هم له حکومت او هم له طالبانو غواړو چې باید اوربند وغځوي او په دې ترڅ کې سولې ته راضي شي او خبرو ته کېني"
عزیزي وویل، په کاروان کې شامل کسان له پېښوره تر تورخمه په پښو راغلي، له تورخمه تر جلال اباده د امنیتي ستونزو له کبله په ځینو سیمو کې په موټرو کې تګ ته مجبور شول او تر کابله پر پاتې لاره به پلي ولاړ شي.
د افغان کډوالو د سولې کاروان د هلمند د سولې له ولسي حرکت وروسته په افغانستان کې د سولې لپاره دوهم لوی غورځنګ دی چې هم پر افغان حکومت او هم پر وسله والو طالبانو د اوربند او سولې غږ کوي.