د ولسمشر محمد اشرف غني د اوربند د تمديد اعلان د ګڼو هېوادونو او سازمانونو له هرکلي سره مخ شوى دى.
د امريکا متحدو ايالتونو د بهرنيو چارو وزير مايک پامپيو پرون شنبه ناوخته په يوه اعلاميه کې ويلي، د اختر پر مهال د نافذ شوي اوربند هرکلى کوي.
مایک پامپیو
په اعلاميه کې ويل شوي:
"موږ د افغان سرتېرو، پوليسو او د طالب جنګياليو عکسونه ليدلي چې د يو بل تر څنګ د اختر لمانځه ته ولاړ وو، که افغانان په ګډه لمونځ کولاى شي، رهبران يې هم د خپلو اختلافاتو د حل لپاره په ګډه خبرې کولاى شي."
.@SecPompeo: We support @ashrafghani%27s offer to extend the ceasefire and begin peace talks in #Afghanistan. The United States stands ready to work with parties to reach a peace agreement and political settlement that brings a permanent end to this war. https://t.co/ayXwmwvNzE
— Heather Nauert (@statedeptspox) June 16, 2018
د بريتانيا د بهرنيو چارو وزير بوريس جانسن هم په يوه اعلاميه کې د ولسمشر غني د اوربند د غځولو د اعلان هرکلى کړى دى.
ښاغلي جانسن ويلي:
"د اوربند غځولو اعلان ښيي چې افغان حکومت د خپلو خلکو چې په شدت د سولې ملاتړ کوي، غوښتنې ته غوږ نيسي."
د ناټو سرمنشي ينس سټولټنبرګ په ټوېټر کې ليکلي چې د اوربند د غځولو اعلان طالبانو ته غټ چانس ورکوي چې ثابته کړي، دوى داسې سوله ييز راتلونکى غواړي چې افغانان يې غوښتنه لري او مستحق يې دي.
I welcome President @ashrafghani%27s announcement of an extension of the #ceasefire in #Afghanistan. This is a unique opportunity for the Taliban to show they want the peaceful future that the Afghan people demand and deserve.
— Jens Stoltenberg (@jensstoltenberg) June 16, 2018
د افغانستان لپاره د ملګرو ملتونو د سرمنشي ځانګړي استازي تاداميچي ياماموتو هم پرون په يوه اعلاميه کې د ولسمشر غني د تصميم د هرکلي تر څنګ ويلي، دا فرصت بايد له لاسه ورنه کړل شي.
As Afghan Gov%27t extends ceasefire with Taliban, UN urges both sides to %27seize the opportunity%27 to work towards lasting peace. https://t.co/CiI9cMAJPI
— UN News (@UN_News_Centre) June 16, 2018
ښاغلي ياماموتو ويلي:
"د افغانستان د حکومت له خوا د اوربند تمديد، په افغانستان کې روانې لانجې ته د حللار موندنې په هدف، د خبرو پيل ته يو څرګند فرصت برابروي."
بل خوا په افغانستان کې د ناټو تر مشرۍ لاندې د قاطع ملاتړ ماموريت په يوه اعلاميه کې وويل، د ولسمشر غني د اوربند د اعلان تر څنګ له وسله والو طالبانو سره د سولې د خبرو لپاره د ولسمشر غني د پېشنهاد ملاتړ کوي.
NATO-led Resolute Support and @USFOR_A support the announcement, by President Ashraf Ghani for an extension of the #ceasefire with the #Taliban and his offer to begin peace talks. https://t.co/Qee7Cst9iw pic.twitter.com/U62yOoGzLM
— Resolute Support (@ResoluteSupport) June 16, 2018
اروپايي ټولنې هم ويلي چې د افغان حکومت او طالبانو له خوا په اختر کې تاريخي اوربند، په تېره ١٧ کلنه شخړه کې، افغانانو ته هغه مهلت ورکړ چې دوى ورته سخته اړتيا درلوده.
د دې ټولنې د بهرني سياست مشرې فيدريکا موګيريني په اعلاميه کې ويلي، اروپايي ټولنه له دواړو لوريو غوښتنه کوي چې خپلو تعهداتو ته درناوى وکړي.
Powerful images coming from #Afghanistan: the ceasefire has given Afghan people a respite from 17 years of conflict. The #EU supports its extension, asked for by Afghan people & proposed by President @ashrafghani, to build lasting peace together
— Federica Mogherini (@FedericaMog) June 16, 2018
سره له دې چې د وسله والو طالبانو له خوا د اختر په درېيو ورځو کې د اعلان شوي اوربند موده نن يکشنبه پاى ته رسېږي، خو د دې ډلې په وړاندې د افغان حکومت د اوربند موده تر نامعلومې مودې پورې وغځول شوه.
ولسمشر غني له طالبانو هم غوښتي چې خپله د اوربند موده تمدید کړي
ولسمشر محمد اشرف غني پرون ناوخته په يوه ويډيويي پيغام کې وويل:
"د کوچني اختر له څلورمې ورځې څخه د هېواد امنیتي او دفاعي ځواکونو ته د اوربند د تمدید هدایت ورکوم، د تمدید شوي اوربند جزئیات به ډېر ژر ملت سره شریک شي، په ټول هېواد کې وسله والو ځواکونو ته لارښوونه کېږي چې د خلکو د امن او د هېواد د دفاع لپاره د هر ډول حملې او تعرض په وړاندې قاطع او هراړخيز چمتووالى ولري."
ولسمشر محمد اشرف غني له وسله والو طالبانو هم وغوښتل چې خپل اوربند تمديد کړي.
وسله والو طالبانو تر اوسه رسماً د افغان حکومت له خوا د اوربند غځولو د اعلان په اړه تبصره نه ده کړې.
د افغانستان ولسمشر محمد اشرف غني د غبرګولي په ١٧مه په يوه ويډيويي پيغام کې د روژې له ٢٧مې د کوچني اختر تر پنځمې د اوربند اعلان کړى و.
د ولسمشر تر هغه اعلان ٢ ورځې وروسته وسله والو طالبانو اعلان وکړ چې د اختر په درېيو ورځو کې اوربند کوي.
افغان حکومت ويلي چې د اوربند په دغه پېشنهاد کې داعش، القاعده او نورې بهرنۍ، سيمه ييزې يا نړيوالې ترورېستي ډلې شاملې نه دي.
طالبانو بيا ويلي چې د دوى له اوربنده بهرني ځواکونه عمدتاً امريکايي پوځيان مستثنى دي.
د سولې عالي شورا وايي چې د طالبانو په وړاندې د اوربند غځولو اعلان کولاى شي، په افغانستان کې دايمي سولې ته زمينه برابره کړي.
د دغې شورا مرستيال عطاء الرحمن سليم ازادي راډيو ته وويل:
"دا کار خبرو اترو او د يو بل زغملو ته زمينه برابروي، دېته لار هواروي چې ټول يو بل درک کړي او دې حقيقت ته ورسېږي چې جنګ حللاره نه ده، نو موږ بايد د خپلو غوښتنو لپاره د خبرو اترو، مذاکرو او تفاهم لار خپله کړو، موږ په تېرو دوو ورځو کې د دغه اوربند مثبت اثرات وليدل."
د وسله والو طالبانو مشر ملا هبت الله اخندزاده تېره اوونۍ د اختر په مناسبت په خپل پيغام کې د امريکا له متحدو ايالتونو سره پر مستقيمو خبرو ټينګار کړى و.
خو ولسمشر محمد اشرف غني په خپلو پرونيو خبرو کې وويل چې افغان حکومت د سولې د هراړخيزو مذاکرو تر څنګ په افغانستان کې د بهرنيو پوځيانو د حضور، نقش او راتلونکي سرنوشت په اړه هم بحث ته حاضر دى.