- وال سټریټ ژورنال
وال سټریټ ژورنال ورځپاڼه په یوه مطلب کې په افغانستان کې د حکومت او وسلهوالو طالبانو لهخوا د اوربند اعلانونو ته د اشارې په ترڅ کې لیکي:
ولسمشر اشرف غني تېره اوونۍ د طالبانو په وړاندې چې کابل او واشنګټن له هغو سره د سولې لپاره هڅه کوي، مؤقت اوربند اعلان کړ، خو ورځپاڼه زیاتوي چې د اسلامي دولت نومې ډلې یا داعش پر وړاندې چې په نړۍ کې یوه ډېره تندلارې ډله ګڼل کېږي د افغان او امریکايي ځواکونو عملیات دوام لري.
وال سټریټ ژورنال لیکي:
افغان کمانډو او د امریکا سپېشل فورس ځواکونو د ننګرهار ولایت په ده بالا ولسوالۍ کې د داعش ډلې پر ضد چې د ورځپاڼې په وینا په افغانستان کې یې د وسلهوالو شمېر تخمیناً د یو نیم زر او دوو زرو ترمنځ دی، پوځي عملیات پیل کړي دي.
ورځپاڼه لیکي چې داعش غواړي ده بالا ولسوالۍ د خپلو فعالیتونو په مرکز بدله کړي.
ورځپاڼه د ده بالا د ولسوال رضوانالله بشرمل له قوله لیکي چې نوموړی وايي، دا ډله به په ده بالا کې لهمنځه یووړل شي.
بشرمل وال سټریټ ژورنال ته ویلي چې داعش د دې غرنۍ سیمې یوه کوچنۍ برخه نیولې ده، خو دا سیمې به هم د دې ډلې له ولکې ازادې او د داعش ویروس به لهمنځه یووړل شي.
- انډېپنډنټ
د بریتانیا چاپ انډېپنډنټ ورځپاڼې د اختر په ورځو کې د وسلهوالو طالبانو لهخوا د اوربند اعلان حیرانوونکی او ناڅاپي بللی او پهدې اړهیې په یوه مطلب کې لیکلي:
وسلهوالو طالبانو د اختر په درېیو ورځو کې اوربند ومانه، خو په خپله خبرپاڼه کې یې ویلي چې په افغانستان کې دېره بهرني ځواکونه به له دې اوربنده مستثنی وي او د هغوی پر ضد د دوی عملیات به دوام وکړي.
انډېپنډنټ د مطلب په دوام د اوربند په اړه د طالبانو د خبرپاڼې د هغه ټکي يادونه کوي چې طالبان وايي، دوی به د مقابل لوري د حملو په وړاندې خپلې دفاع ته دوام ورکړي.
انډېپنډنټ د یوه اروپايي ډیپلومات له قوله لیکي چې نوموړی وايي، د اوربند په درېیو ورځو کې به معلومه شي چې د طالبانو یووالی څومره دی.
دې ډيپلومات چې نومیې نهدی یاد شوی انډېپنډنټ ورځپاڼې ته ویلي چې که د طالبانو بېلابېلې ډلې اوربند ونهمني، نو جګړه ښايي دوام وکړي.