د شانګهای د همکارۍ سازمان د مشرانو غونډه نن شنبه په چین کې جوړېږي.
په دې دوه ورځنۍ غونډه کې د افغانستان جمهور رئيس، محمد اشرف غني هم ګډون کوي.
د افغانستان د بهرنیو چارو وزارت ویاند، صبغت الله احمدي ازادي راډیو ته وویل چې افغان لوری به په دې غونډه کې د ترورېزم پر ضد د مبارزې پر څرنګوالي او د سیمه ییز اتصال پر اهمیت خبرې وکړي.
صبغت الله احمدي وویل:
"یو مورد چې بحث به ورباندې کېږي په سیمه کې ګډ امنیتي تهدیدونه دي، موږ به هم پر سیمه ییز اتصال تاکيد وکړو چې د افغانستان د موقف لوړولو او سیاسي، اقتصادي او امنیتي ثبات ته اهمیت لري."
د شانګهای د همکارۍ سازمان اته دایمي غړي لري.
افغانستان د دې سازمان په څلورو څارونکو کې دی.