افغان چارواکي وايي چې د افغانستان او پاکستان اړیکې د بریتانیا د بهرنیو چارو له وزیر سره د اجرائیه رئیس عبدالله عبدالله د لیدنې یوه مهمه موضوع وه.
د اجرائیه ریاست ویاند مجیب الرحمن رحیمي وايي، د بریتانیا د بهرنیو چارو وزیر بورس جانسن د هېواد له اجرائیه رییس سره په کتنه کې ډاډ ورکړ چې پاکستان به د تروریستي ډلو له ملاتړه لاس اخېستو ته وهڅوي.
د افغانستان اجرائیه رئیس عبدالله عبدالله د چهارشنبې په ورځ د یوه درې ورځني رسمي سفر په مقصد لندن ته ورسېد.
افغان چارواکي وايي، ښاغلی عبدالله به د افغانستان او بریتانیا ترمنځ د دوه اړخېزو اړیکو د پراختیا، د ترورېزم پر ضد د مبارزې او د افغان ځواکونو د تجهیز په برخه کې د بریتانیا د مرستو په اړه له بریتانوي چارواکو سره خبرې وکړي، خو ایا دوی به د کابل او اسلاماباد د ترینګلو اړیکو په اړه هم خبرې وکړي؟
د اجرائیه ریاست ویاند وايي چې لندن ته د اجرائیه رئیس د سفر هدف له تروریستي ډلو د پاکستان د ملاتړ په اړه خبرې نهدي، خو دی تأییدوي چې د ښاغلي عبدالله په هره کتنه کې په دې اړه بحث شوی.
ښاغلی رحیمي وايي، بریتانوي چارواکو پهدې کتنو کې ډاډ ورکړی چې پر پاکستان له خپل نفوذه به کار واخلي او وبه یې هڅوي چې د سیمې لپاره د امریکا د نوې ستراتیژۍ په رڼا کې د تروریستي ډلو له ملاتړ څخه لاس واخلي.
رحیمي زیاتوي:
"موږ دلته پردې خبرې وکړې چې پاکستان لاهم د تروریستانو ملاتړ کوي او په سیاست کې یې کوم بنیادي تغییر نهدی راغلی. دلته رسمي موقف دا و چې موږ له دې خبر یو او موږ ته روښانه ده چې پاکستان د تروریستانو ملاتړ کوي خو موږ به خپلو هڅو ته دوام ورکړو څو پاکستان په خپل سیاست کې بدلون راولي."
د اجرائیه ریاست ویاند مجیب الرحمن رحیمي
ښاغلی رحیمي وايي چې عبدالله او جانسن د افغانستان په سوله کې پر پاکستان سربېره د ایران او د منځنۍ اسیا د هېوادونو او د سیمې د نورو هېوادونو پر ونډه هم خبرې وکړي.
د اجرائیه ریاست ویاند د افغان او پاکستاني چارواکو وروستیو لیدنو کتنو ته د اشارې په ترڅ کې وویل چې دا لړۍ به یوې مثبتې نتیجې ته د رسېدو تر وخته دوام وکړي.
بریتانیا له افغانستان سره د مهمو مرستندویو هېوادونو له ډلې دی او په تېرې یوه نیمه لسیزه کې یې له متحدایالاتو وروسته له افغانستان سره خورا زیاتې مالي او پوځي مرستې کړي دي.