ډېرو نړیوالو ورځپاڼو په کابل کې پر دیني عالمانو د دوشنبې د ورځې حملې ته پام اړولی دی.
- وال سټریټ ژورنال
وال سټریټ ژورنال ورځپاڼې تر دې سرلیک لاندې چې افغان دیني عالمانو ځانوژونکې حملې ناروا وبللې چې یوه ځان وژونکي یې پر غونډې برید وکړ، په یوه مطلب کې لیکي:
په سلګونه دیني عالمانو په کابل کې په غونډه کې د یوې فتوا په صادرولو سره ځانوژونکې حملې او پهدې هېواد کې ۱۷ کلنه جګړه د اسلامي شریعت ضد وبللې چې د دوی په وینا یوازې پهکې د مسلمانانو وینې تویېږي.
د ورځپاڼې په لیکنه په دغه ځانوژونکې حمله کې چې مسؤلیتیې د اسلامي دولت نومې ډلې یا داعش په غاړه اخیستی، په وژل شویو او ټپیانو کې د دې غونډې څو تنه ګډون کوونکي دیني عالمان هم شامل دي.
- واشنګټن پوسټ
واشنګټن پوسټ ورځپاڼه د دغې حملې په اړه د مطلب په یوه برخه کې د دیني عالمانو د صادر شوې فتوا په اړه لیکي، دیني عالمانو پهدې ټینګار وکړ چې په افغانستان کې وسلهوال بغاوت مذهبي اساس نهلري او هغه ځانوژونکې حملې چې اکثره وختونهیې وسلهوال طالبان او داعش کوي حرامې او په اسلام کې ناروا دي.
ورځپاڼې د ديني عالمانو د فتوا او پر هغوی د حملې په اړه د افغان ولسمشر څرګندونې هم راخیستي چې د دیني عالمانو د دې دریځ د ملاتړ تر څنګیې د حملې غندنه کړې او هغهیې د اسلام د ستر پیغمبر پر وارثینو حمله بللې ده.
واشنګټن پوسټ لیکي:
دا د افغانستان په ۱۷ کلنه جګړه کې لومړی ځل دی چې د دې هېواد دیني عالمان یوه فتوا صادروي چې په هغې کې د جګړې له ښکېلو خواوو د جګړې د درېدو، د یوه اوربند د ټینګېدو او د سولې د خبرو د پیلېدو غوښتنه کوي.
د واشنګټن پوسټ په لیکنه، د افغانستان د دیني عالمانو د شورا غړي او د ولسمشر غني سلاکار عنایتالله بلیغ دې غونډې ته د وینا په یوه برخه کې پهدې ټینګار وکړ چې دیني عالمان په افغانستان کې د بهرنیو پوځیانو د حضور ملاتړ کوي او دوی ته پهکار ده چې یوه لویه غونډه جوړه او پهکې پهدې هېواد کې د جګړې د پای ته رسېدو لارې ولټوي.
وسلهوالو طالبانو چې له دې مخکې یې د افغانستان له حکومت سره د سولې د خبرو وړاندیزونه رد کړي د دیني عالمانو دغه فتوا هم رد کړې ده.