په اردن کې د حکومت د سختو اقتصادي پرېکړو له امله د زرګونه کسانو مظاهره نن دوشنبه هم دوام لري.
شااوخوا درې زره مظاهرهکوونکي د پایتخت عمان سړکونو ته راوتلي او د حکومت د هغې طرحې مخالفت کوي چې لهمخې يې د ماليې نوی قانون جوړېږي او بیې لوړېږي.
د پیسو نړیوال وجهي صندوق یا «ای. اېم. اېف» بیا د اردن د حکومت له نوې اقتصادي طرحې ملاتړ کړی دی.
اعتراض کوونکي د صدراعظم هاني ملقي د ګوښه کېدو غوښتنه کوي او ګواښ کوي چې تر څو پورې پارلمان ته استول شوې اقتصادي طرحه لغوه شوې نهوي، دوی به خپلو مظاهرو ته دوام ورکړي.
په همدې حال کې یوې سرچینې روېټرز خبري اژانس ته ویلي چې نن د ورځې په وروستیو کې به د اردن پاچا عبدالله دوهم د مظاهرهچیانو د غصې د کمولو په هدف له صدراعظم وغواړي چې استعفا وکړي.