د افغانستان د راډیو، ټلوېزیون، سینما او ټیاټر نامتو لوبغاړی «ف عبادي» پرون پنجشنبې د ۷۳ کلونو په عمر په حق ورسېد.
«ف عبادي» د فضل الحق عبادي هنري نوم و. هغه له ۱۹۹۸ کال را پهدې خوا له خپلې کورنۍ سره د اتریش په پلازمېنه ویانا کې اوسېده او ډېره موده د ناروغۍ په بستر کې پروت و.
عبادي د ۱۳۴۶ او ۱۳۵۶ کلونو ترمنځ لسیزه کې د مشهورو پرلهپسې داستانونو او راډیويي ډرامونو له نامتو لوبغاړو څخه و چې تر ډېره به یې منفي رولونه لوبول.
د ملي راډیو ټلوېزیون د راډیويي او ټلوېزیوني ډرامو د څانګې پخواني مشر وحید صمدزي د عبادي د هنري مقام په اړه ازادي راډیو ته وویل:
"خدای بخښلی «ف عبادي» ډېر پیاوړی هنرمند او ډېر ښه لوبغاړی و. هغه وکولای شوای چې د خپل ځانګړي غږ په مرسته تر ډېره منفي رولونه ولوبوي."
په افغانستان کې د ټلوېزیون له جوړېدو وروسته هم عبادي په ډېرو ټلوېزیوني ډرامو کې رول ولوباوه.
پهدې ډله کې د شیراغا او شیرینګل مشهور سریال د یادونې وړ دی چې عبادي د لالاغا رول پهکې لوبولی و.
د دې ډرامې دوه مرکزي رولونه حاجي محمد کامران او حمیدې عبدالله لوبولي وو.