د ایران د بهرنیو چارو وزیر وايي، تهران او اروپايي قوتونه وروسته له هغې چې واشنګټن د ۲۰۱۵ میلادي کال د اټمي تړون څخه ووت، د دې تړون د ژغورنې لپاره یو "ښه پیل" کړی.
جواد ظریف د سې شنبې په ورځ ناوخته په بروکسل کې د جرمني، فرانسې او بریتانیا د بهرنیو چارو له وزیرانو سره تر لیدنې وروسته وویل:
"موږ په سم لوري روان یو، ډېر پهدې پورې اړه لري چې په راتلونکو څو اوونیو کې موږ څه کولای شو."
د اروپايي ټولنې د بهرني سیاست له مشرې فدریکا موګرېني چې پهدې غونډه کې یې برخه لرله وویل:
"وزیرانو دې ته چمتووالی وښود چې د تهران سره د اټمي تړون د ساتلو لپاره عملي لارې پیدا کړي."
نوموړې زیاته کړه چې د دې کار لپاره په بیړه د اقداماتو پر اهمیت ټول لوري پوهېږي او ټولو خواوو سلا وکړه چې په څو اوونیو کې به د هواري لارې پیدا کړي.
د ایران د بهرنیو چارو وزیر جواد ظریف د خپل هغه نړیوال سفر په وروستي پړاو کې بروکسل ته تللی چې غواړي د ایران او د نړۍ د شپږو پیاوړو هېوادونو ترمنځ په ۲۰۱۵ میلادي کال کې د شوي اټمي تړون لپاره ملاتړ راخپل کړي.
د امریکا د متحده ایالاتو ولسمشر ډونالد ټرمپ تېره اوونۍ له دې تړونه د وتلو اعلان وکړ او ویېویل ایران په منځني ختیځ کې د وسلهوالو په تمویل او د لیرې واټن ویشتونکو توغندیو په ازموینې د دې تړون له روحیې سرغړاوی کړی دی.