د پاکستان د بهرنیو چارو وزارت وايي، افغان لوري ورته د هغو پینځو وژل شوو سرتېرو جسدونه وسپارل چې د ډیورند کرښې په اوږدو کې په وروستۍ نښته کې وژل شوي دي.
د بهرنیو چارو د وزارت ویاند محمد فیصل نن په اسلام اباد کې خبریالانو ته وویل چې د پنځو پاکستانیو سرتېرو په جسدونو سربېره افغان مقاماتو هغه پاکستانی عسکر هم بېرته دوی ته سپارلی دی چې د خوست په ځاځي میدان سیمه کې د جګړې پر مهال نیول شوی و.
نوموړي وویل د ډیورند پر کرښه دا وروستۍ شخړه د دواړو هېوادونو د ډیپلوماټیکو او پوځي چینلونو له لارې حل شوې ده.
پاکستان دا وروستۍ نښته د پاکستان پر پوله برید بللی دی خو افغان ځواکونه وايي جګړه وروسته تر هغې ونښته چې پاکستاني سرتېري د ډیورند له کرښې دې غاړه را واوښتل.