د افغانستان د کانونو او پټرولیم وزارت په هرات کې د مالګې د استخراج یوه توافقنامه فسخه کړه.
دا توافقنامه نږدې درې میاشتې مخکې د ناصر امید په نوم له یوه شرکت سره لاسلیک شوې وه.
د کانونو او پټرولیم وزارت ویاند عبدالقدیر مطفي ازادي راډیو ته وویل چې د کان په ځای کې نورې زېرمې موندل شوي، نو توافقنامه مو لغوه کړه.
ده زیاته کړه:
"دا سیمه رسوبي ده، هلته باید پلټنې زیاتې شي، ترڅو کومې سرچینې چې هلته شته هغه پیدا کړو."
د هرات په غوریان ولسوالۍ کې د مالګو د دې کان توافقنامه داسې شوې وه چې هر کال به ترې ۲۵ زره ټنه مالګه استخراجېږي او د یوه ټن پر سر به شرکت حکومت ته نږدې ۱۱ سوه افغانۍ ورکوي.