برښنا شرکت وايي، تر راتلونکو څلورو ورځو پورې به کابل ته د وارداتي برښنا لېږد بېرته پیل شي.
طالبانو څو ورځې وړاندې په بغلان ولایت کې د برښنا یوه پایه وغورځوله چې له املهيې د کابل برښنا په لویه اندازه اغېزمنه شوې ده.
د برښنا شرکت ویاند وحیدالله توحیدي تېره شپه ازادي راډیو ته وویل، د سیمې مخورو له طالبانو ژمنه اخیستې ده چې لهدې وروسته به د برښنا د انتقال بهیر نهخرابوي.
دی زیاتوي:
"دا ځل مو چې د قومونو د سپینږیرو او مشرانو له لارې خبرې وکړې، پهدې قناعت وشو چې لهدې وروسته به د برښنا پایو ته زیان نهرسوي. د دې ضمانت سپینږیرو کړی دی. موږ هم هڅه کوو چې د افغانستان د ټولو سیمو اوسېدونکو ته برښنا ورسوو."
د برښنا شرکت ویاند توحیدي وویل، په بغلان کې د نړول شوې پايې د ترمیم او بیا درولو چارې ۴۰ په ۱۰۰ کې پوره شوي دي او هیله ده چې تر څلورو ورځو به کابل ته د ازبکستان د وارداتي برښنا جریان بیا پیل شي.