د ارزګان ولایت سیمهییز چارواکي وايي، د دغه ولایت په مرکز ترینکوټ کې د افغان پوځ له لوري د نصرت په نوم په پیل شویو عملیاتو کې ۱۷ وسلهوال طالبان او یو افغان سرتېری وژل شوی.
پهدې عملیاتو کې ۲ افغان سرتېري او ۸ وسلهوال طالبان ټپيان هم دي.
د والي ویاند دوست محمد نایاب د دوشنبې په ورځ ازادي راډيو ته وویل چې افغان ګډو ځواکونو دغه عملیات چې بهرني ځواکونهيې هم ملتیا کوي له تېرو درې ورځو راهیسې د دغه ولایت مرکز ترینکوټ اړوند «ګوګرک» سیمه کې د وسلهوالو طالبانو د ځپلو په هدف پیل کړي دي.
نوموړی وايي، د یادو عملیاتو پر مهال د «ګوګرک» سیمه د وسلهوالو طالبانو له شتونه پاک کړي او په خبره چې عملیاتيې لاهم په سیمه کې روان دي.
بلخوا بیا د وسلهوالو طالبانو ویاند قاري یوسف احمدي ازادي راډيو ته په یوه استول شوي برښنالیک کې ویلي چې دغلتهیې د افغان پوځ روان عملیات په شا تمبولي او ګڼ شمېر افغان سرتېرو تهیې مرګ ژوبله اړولې ده.
دا په داسې حال کې ده چې تېره ورځ د دغه ولایت د ولایتي شورا مسؤلینو ویلي و چې دغلته د افغان پوځ روانو عملیاتو کومه پایله نهده ورکړې او تجارتي بڼه لري.
په فاریاب کې هم پوځي عملیات شوي دي. د فاریاب د والي ویاند عبدالکریم یورش نن یکشنبه ازادي راډیو ته وویل چې په پښتونکوټ ولسوالۍ کې ۵ وسلهوال طالبان وژل شوي او نهه تنه زخمیان شوي دي.
د یورش په وینا د فاریاب چغربلاق، ملایان، برګ علي او ترکمنان ولسوالۍ له وسلهوالو طالبانو خلاصې شوي دي.