د سوریې په شمال او جنوب کې پرون زرګونه ملکیان له خپلو سیمو وروسته تر دې ووتل چې د سوریې حکومت او ترکي ځواکونو عملیات وکړل.
د الابراهیم په نوم د سوریې یوه دولتي چارواکي روېټرز اژانس ته پرون یکشنبه وویل:
"تر شلو زرو ډېر هېوادوال له غوطې څخه وتلي دي، لکه څرنګه چې تاسو ګورئ، شااوخوا ډېر بیروبار دی."
غوطه پلازمېنې دمشق ته نېږدې پرته ده، د دې سیمې د نیولو لپاره روسي ځواکونه د سوریې د حکومتي پوځیانو ملاتړ کوي.
په بریتانیا کې د سوریې د بشري حقونو د څار د ډلې په وینا، د غوطې په جګړه کې تر اوسه نېږدې ۱۴ سوه ملکیان وژل شوي دي.
د سوریې په شمال کې یوه بله جګړه چې هغه هم لا پایته نه ده رسېدلې، په عفرین سیمه کې د ترکي ځواکونو له لورې روانه ده.
ترکي پوځیان د هوا او ځمکې له لارې عملیات کوي چې دا سیمه له کردانو ونیسي.
د بشري حقونو د څار د ډلې په وینا، په عفرین کې د درې ورځنیو عملیاتو په ترڅ کې تر دوه لکه ډېر ملکیان لارو کوڅو ته راوتلي او کورونه یې پرې ایښي دي.
د ملګرو ملتونو د راپور له مخې، د سوریې په اووه کلنه جګړه کې تر درې نیم لکه ډېر کسان وژل شوي دي.