د پکتیکا ولایت چارواکي وايي، د اول خان په نوم يوه کس چې وسلهوالو طالبانو تښتولى وو، ٧ وسلهوال طالبان وژلي او بيا په تېښته بريالى شوى دى.
د پکتيکا چارواکي وايي، دغه کس د سروبي ولسوالۍ د سيمهييزو پوليسو د قوماندان دريا خان ورور دى، په دې ولسوالۍ کې وسلهوالو طالبانو ونيوه.
د اول خان په حمله کې د ١٨ نورو وسلهوالو طالبانو د ټپي کېدو خبر هم ورکړل شوى دى.
د پکتيکا مطبوعاتي دفتر پرون ماښام په يوه اعلاميه کې ويلي، وسلهوالو طالبانو غوښتل اول خان خپل مشر ته ورولي، خو دى وتوانېد د لارې په اوږدو کې دغو وسلهوالو ته مرګ ژوبله واړوي او په تېښته بريالى شي.
تر اوسه وسلهوالو طالبانو په دې اړه څه نهدي ویلي.