د ننګرهار چارواکي د جلالاباد-تورخم د لارې د خونديتوب لپاره ٣٠٠ کسيز ولسي ځواک جوړوي.
د والي وياند عطاالله خوګياڼي پرون چهارشنبه ازادي راډيو ته وويل، دغه ځواک به د افغان قواوو د نورو تشکيلاتو په څنګ کې فعاليت ولري.
ښاغلی خوګیاڼی زیاتوي:
"د دې لپاره چې د تورخم-جلالاباد امنيتي ستونزې حل او په ورڅېرمه ولسواليو کې دښمن وځپل شي، په پلان کې لرو چې د بټيکوټ، مومندرې او غنيخېلو ولسواليو له ٣٠٠ تنو څخه ولسي ځواک په دنده وګمارو."
د ننګرهار د والي وياند وايي، تجربو ښودلې ده چې په دغه ولايت کې ګمارل شوي ولسي ځواک د امن په ټينګښت کې مؤثر رول لوبولى دى.