د افغانستان پوځي قوماندانانو او جګپوړو مسؤلينو د نصرت ۹۷ پوځي عملیاتو د پیلولو په باب خبرې وکړې.
ټاکل شوې ده چې دا عملیات په را روان پسرلي کې د افغانستان د دولت د وسله والو مخالفينو پر ضد پیل شي.
د افغانستان د ملي اردو د قول اردوګانو قوماندانان او یو شمېر نور پوځي مسؤلين پر دې موضوع د بحث لپاره په کابل کې په یوه درې ورځیني سمینار کې راغونډ شوي وو.
د دفاع وزارت ویندوی جنرال دولت وزیري تېره شپه ازادي راډیو ته وویل، په دې سیمینار کې د خالد عملیاتو پر قوي او کمزورو ټکو تمرکز وشو او په راتلونکو عملیاتو کې ورته د پاملرنې غوښتنه وشوه.
د افغانستان د امنیتي او دفاعي ځواکونو قوماندانانو همداراز د درې ورځیني کنفرانس په پای کې پرون له ولسمشر غني سره وکتل.
افغان امنیتي او دفاعي ځواکونه غواړي چې د طالبانو تر پسرلنیو عملیاتو وړاندې، د دې ډلې د کمزوري کولو لپاره عملیات پیل کړي.
طالبان هر کال د هوا له تودېدو سره جګړې ته زور ورکوي.