افغان ولسمشر اشرف غني وايي، د طالبانو مرکز پاکستان دی او دا هېواد باید دوی ته د سپارل شویو لېستونو او معلوماتو سره سم قاطع تصمیم ونیسي.
ولسمشر اشرف غني نن د جمعې د لمانځه پر مهال په ارګ کې راټولو شویو خلکو ته وویل:
"موږ له پاکستاني لوري څخه د عملي اقداماتو غوښتونکي یو، خبرې او پروسې د کاعذونو پر مخ خبرې دي او افغان ولس په څرګنده د عمل غوښتونکی دی."
ولسمشر د وروستیو بریدونو وروسته د کابل په شمول په ځینو ولایتونو کې د مخالفو وسله والو پر ضد د عملیاتو یادونه وکړه او دا یې بریالي وبلل.
نوموړي وویل، امنیتي ادارې د یکشنبې په ورځ ورته د کابل د امنیت یو هر اړخېز پلان سپاري چې په عملي کېدو به یې په دې ښار کې امنیت بهتره شي.
افغان ولسمشر همدارنګه ټینګار وکړ چې د خلکو د امنیت په برخه کې واړه سیاستونه ځای نه لري او په دې برخه کې به جوړجاړی ونه کړي.