ټاکل شوې ده چې په افغانستان کې د سولې او ثبات په هدف د کابل د پروسې دوهمه غونډه د راتلونکې فبرورۍ میاشې پر ۲۶ نېټه جوړه شي.
د افغانستان د بهرنیو چارو د وزارت سیاسي مرستیال حکمت خلیل کرزي تېره ورځ د ملګرو ملتونو امنیت شورا ته وویل د کابل د پروسې په دوهمه غونډه کې به افغان حکومت د سولې لپاره خپل طرحه وړاندې کړي:
"موږ به نړیوالې ټولنې ته د سولې د پروسې او له ترورېزم سره د مبارزې په اړه خپله راتلونکې تګلاره وړاندې کړو، د منځنې اسیا د هېوادونو په ګډون موږ د دې پروسې د ټولو شریکانو په بشپړ ملاتړ او تائید حساب کوو."
د کابل د پروسې لومړنۍ غونډه په تېره جوزا میاشت کې ترسره شوه.
د ملګرو ملتونو د امنیت شورا پرون د افغانستان د وضعیت او تحولاتو په اړه ځانګړې غونډه وکړه.