افغانستان د پاکستان په اړه د امریکا د ولسمشر د وروستيو څرګندونو هرکلی کړی دی.
په امريکا کې د افغانستان سفير حمدالله محب وویل چې پاکستان تر اوسه په دې هېواد کې د هغو ترورېستانو ځالې لهمنځه نهدي وړي چې په افغانستان کې دوامداره حملې کوي.
ښاغلي محب د دوشنبې په ورځ «۱۳۹۶ کال د مرغومې ۱۱» له ازادي راډيو سره په خبرو کې وويل:
"د هغو مرستو چې دوی يې د ترورېزم سره د مبارزې لپاره له امریکا اخلي، بندېدل پر پاکستان مستقيم فشار راوړي چې موږ یې هرکلی کوو."
په امریکا کې افغان سفیر دا څرګندونې وروسته له دې کوي چې د امریکا ولسمشر ډونالد ټرمپ د نوي کال په لومړۍ ورځ په خپل لومړي ټويټ کې پاکستان درواغجن هېواد وباله او ويېویل چې امریکا يې د ترورېزم پر وړاندې په مبارزه کې تېر ايستلی دی، ځکه د ده په وينا پاکستان اوس هم ترورېستانو ته خوندي ځايونه ورکوي.
د ټرمپ تر دغو څرګندونو وروسته د پاکستان د بهرنيو چارو وزیر پر خپله ټويټر پاڼه کې لیکلي چې ډېر ژر به د ټرمپ ټويټ ته عکسالعمل وښيي او نړۍ ته به د افسانې او رښتیا ترمنځ توپیر واضح کړي.