د روسیې ولسمشر ولادیمیر پوتین یو داسې قانون توشیح کړ چې له مخې یې د تندلارو د استخدام له کبله، مجازات ډېرېږي.
د دغه قانون پر اساس پر هغو کسانو هم سزاوې سختېږي چې د وسله والو تندلارو مالي ملاتړ کوي.
د روسي چارواکو په خبره، دا اقدام د هغه ګواښ ځواب دی چې له منځني ختیځ څخه خپل هېواد ته د روسي جګړه مارو د بېرته ورتګ څخه رامنځته کېدای شي.
دغه قانون ۲ ورځې وروسته له هغه رسمي بڼه واخيسته چې د روسیې په سنت پټرز بورګ ښار کې د جمعې په ورځ په یوه پلورنځي کې د بمي برید په نتیجه کې ۱۴ تنه ټپیان شول.
ولسمشر پوتین دا برید یو ترورېستي اقدام وباله.
د اسلامي دولت ډلې یا داعش د دې برید مسؤلیت ومانه.
د روسیې دغه نوی قانون د روانې میاشتي په پیل کې د روسیې د پارلمان له خوا تصویب شو.
د روسیې امنیتي چارواکي له دې احتماله اندېښمن دي چې د دې هېواد یو شمېر وګړي چې په منځني ختیځ کې د تندلارو تر څنګ ولاړ وو، بېرته به روسیې ته مخه کړي.
داعش سږکال په عراق او سوریې کې تر ډېره د دوی تر واک لاندې سیمو څخه وایستل شول.
د روسیې د فدرال امنیتي ادارې د اټکل له مخې، د هغو روسانو چې په منځني ختیځ، د افریقا په شمال او نورو سیمو کې له تندلارو وسله والو سره یوځای شوي، شمېر یې څه باندې ۴۵۰۰ ته رسېږي.