د روسیې ولسمشر ولادیمیر پوتین د امریکا له لوري د چچین پر مشر رمضان قدیروف لګېدلي بندیزونه غیر قانوني او غیر دوستانه وبلل.
د کرملېن ویاند دمیتري پسکوف نن خبریالانو ته وویل چې په قوي احتمال به روسیه د امریکا د دغه اقدام په وړاندې متقابل غبرګون وښیي.
د امریکا د خزانې وزارت د ماګینتسکي قانون له مخې دوه ورځې وړاندې د چچین پر مشر چې په ځورونې او له محاکمې پرته پر قتلونو تورن دی، مالي بندیزونه ولګول.
دمیتري پسکوف وویل، ډېر احتمال شته چې روسیه د متقابل اقدام په توګه د بشري حقونو څخه د سرغړونې په تور روسیې ته د امریکایي اتباعو د تګ مخه ونیسي.