د جرمني صدراعظمې انګلا مېرکل ژمنه وکړه چې د ترهګرو د بریدونو د مخنیوي چارې به ښې شي.
انګلا مېرکل دا خبره وروسته تر دې وکړه چې په برلین کې د تېر کال د ترورېستي برید د قربانیانو خپلو خپلوانو انتقاد وکړ.
انګلا مېرکل پرون د دې پېښې د تلین په مناسبت خبریالانو ته په برلین کې وویل:
"زما په باور، البته زه د ټول حکومت په استازیتوب خبرې کوم چې کله وایم، موږ د هغه څه د ښه کېدو لپاره هڅې کوو چې ښه نهوي، د دې معنی دا ده چې موږ به هر څه چې له انساني پلوه ممکن وي، د امنیت په ګډون ښه کړو. همداراز هڅې کوو هغه خلک چې د دې پېښې له امله اغېزمن شوی، عادي ژوند ته راوګرځي."
یو کال مخکې د ډسمبر په ۱۹مه په برلین کې د انس امیري په نوم یوه تونسي کډوال پر موټر ۱۲ تنه ووژل او ۷۰ تنهیې ټپیان کړل.