په کوټه کې پر کلیسا د پرونۍ حملې مسؤلیت د اسلامي دولت په نوم وسلهوالې ډلې، داعش اخېستی دی.
په حمله کې چې پرون یکشنبه «۱۳۹۶ کال د لیندۍ ۲۶» د کوټې د مسیحیانو د دعا د ځانګړو مراسمو پرمهال وشوه، لږترلږه نهه تنه ووژل او تر ۵۰ زیات زخمیان شول.
د بلوچستان د کورنیو چارو ایالتي وزیر سرفراز بګټي پرون وویل چې حمله دوو وسلهوالو کسانو کړې وه.
د بګټي په وینا، په کلیسا کې تر ۴۰۰ زیاتې ښځې، نارینه او ماشومان د دعا د ځانګړو مراسمو لپاره راغونډ شوي وو.
د کوټې مسیحیانو دا ځانګړي مراسم د عیسی مسیح د زېږېدو د اختر یا کرسمس په مناسبت جوړ کړي وو.
سرفراز بګټي وویل چې یوه حمله کوونکي د کلیسا په دروازه کې ځان والوزاوه.
د بلوچستان د کورنیو چارو ایالتي وزیر سرفراز بګټي
خو دوهم مخکې تر دې چې ځان والوزوي، د بلوچستان د پولیسو په ډزو کې ووژل شو.
د بلوچستان یوه اوسیدونکي خرم چې د حملې په ځای کې و، پرون یکشنبه «۱۳۹۶ کال د لیندۍ ۲۶» رویټرز خبري اژانس ته وویل:
"په کلیسا کې د یکشنبې د ورځې مراسم د پېل په حال کې و چې تر دعا ویلو مخکې، د ډزو غږ واورېدل شو، په هغه پسې چاودنې وشوې. یو شمېر خلک ووژل او زخمیان شول."
ځایي چارواکي: د کوټې په یوه کلیسا کې ځانوژونکي برید شوی
د بلوچستان ایالت د پولیسو رئیس معظم انصاري ویلي چې زیات هغه کسان وژل شوي او زخمیان شوي چې د چاودنې په وخت کې د کلیسا په دروازه کې ولاړ وو. د هغه په وینا، ډېر خلک د هېندارو د ماتېدو له امله زخمیان شوي دي.
په وژل شوو کې دوه ښځې هم دي.
د پاکستان پولیسو ویلي چې زخمیان روغتون ته لېږدول شوي او د ډېرو کسانو روغتیايي وضعیت نازک دی.
د پاکستان د حکومت لوړ رتبه چارواکو په بلوچستان کې پر کلیسا حمله په شدت غندلې ده.
د پاکستان د خارجه وزیر ویاند محمد فیصل پر ټوېټر پرون ولیکل:
"دا ډول بُزدلانه کارونه به له ترورېزم سره په مبارزه کې د پاکستان عزم کمزوری نهکړي."
پاکستان ۲۰۰ میلیونه وګړي لري چې یو اعشاریه شپږ فیصده برخه یې عیسویان دي.
هلته وخت ناوخت د عیسویانو او نورو دیني او مذهبي لږکیو پر ضد د پراخ تبعیض رپوټونه خپرېږي او په مکرر ډول د هغوی پر مذهبي مراسمو او عبادت ځایونو وسلهوالې حملې کېږي.