د فلسطیني ادارې د رئیس تر مشرۍ لاندې فتح ګوند له فلسطینیانو وغوښتل چې اسرائیل ته د امریکا د مرستیال ولسمشر مایک پنس د سفر په لړ کې پراخې مظاهرې وکړي.
ټاکل شوې ده چې ښاغلی پنس د دیسمبر په شلمه یعنې را روانه چهارشنبه «۱۳۹۶ کال د لیندۍ ۲۹» بیتالمقدس ته سفر وکړي.
فتح ګوند پرون شنبه «۱۳۹۶ کال د لیندۍ ۲۵» په یوه اعلامیه کې غوښتنه وکړه چې د امریکا د ولسمشر ډونالډ ټرمپ له لوري د اسرائیل د پلازمېنې په توګه د بیتالمقدس له رسمیت پېژندلو وروسته دې د مرستیال ولسمشر پنس د سفر په لړ کې پراخ اعتراضونه وشي.
د ملګرو ملتونو امنیت شورا هم پرون شنبه «۱۳۹۶ کال د لیندۍ ۲۵» د ډونالډ ټرمپ د پرېکړې د ردولو په خاطر د یوه پرېکړهلیک پر مسودې خبرې پیل کړي.