په ایران کې د زنداني خیریه کارکوونکې نازنین زاغري خاوند وايي، د ده د مېرمنې د خوشې کېدو لپاره روانې هڅې مثبت لور ته روانې دي.
ریچرډ رات کلیف د جمعې په ورځ ازادي راډیو ته وویل، دا هیله مندي ایران ته د برتانيې د بهرنیو چارو د وزیر بوریس جانسن تر سفر وروسته پیدا شوې ده.
د ایران حکومت نازنین زاغري د ۲۰۱۶ میلادي کال په اپریل میاشت کې د حکومت ضد دسیسې په تور زنداني کړه .
مېرمن زاغري دا تور بې اساسه بللی دی .
نوموړي وویل، له کله چې د برتانيې د بهرنیو چارو وزیر تهران ته سفر کړی، مېرمن ته يې اجازه ورکړل شوې چې ده ته زنګ وهي او له خپلوانو سره زیاته لیدنه وکړي.
ریچرډ رات کلیف وویل، د ایران حکومت پر نازنین زاغري د حکومت ضد د پروپاګند کولو تور هم لېرې کړای شوی دی.