د افغانستان دفاع وزارت په نږدې راتلونکي کې په جوزجان ولایت کې د داعش وسلهوالو پر وړاندې د پراخو عملیاتو خبر ورکوي.
د دغه وزارت ویاند ازادي راډیو ته وویل چې په نورو شمالي ولایتونو لکه فاریاب، سرپل، کندز او نورو سیمو کې یې له وړاندې عملیات پیل کړي دي.
جنرال دولت وزیري وایي:
"داعش یوازې د جوزجان په درزاب او قوش تپې کې تحرکات لري، خو هلته هم مرکزونه نهلري. دا دومره ستر خطر نهدی او په نږدې وخت کې بهیې په وړاندې د لهمنځه وړلو عملیات پیل کړو."
ښاغلي وزیري د دغو عملیاتو د وخت او څرنګوالي په اړه جزئیات ورنهکړل.
پهدې وروستیو کې په زابل او ارزګان کې هم د دغې ډلې د فعالیتونو په اړه راپورونه ورکول کېږي.
افغان حکومت د امریکا په ملاتړ په افغانستان کې د دغې ډلې په وړاندې پراخ عملیات ترسره کړي دي چې په ترڅ کې یې د روان کال په اپرېل میاشت کې د ننګرهار په اچین ولسوالۍ کې د داعش وسلهوالو یو لوی مرکز د امریکا د تر ټولو لوی بمي برید هدف وګرځېد او د راپورونو پر اساس لسګونه داعش وسلهوال پهکې ووژل شول.
دفاع وزارت په ټول افغانستان کې له وسلهوالو ډلو په تېره بیا داعش وسلهوالو سره د بهرنیو اتباعو شتون تائیدوي، خو وایي د هغوی د هویت په اړه پلټنې دوام لري.
تر دې وړاندې د جوزجان ولایت چارواکو پهدغو ډلو کې د اروپایي اتباعو د ګډون ادعا کړې وه.