له یمن څخه ټول روسيې ډیپلوماټان ووتل او مسکو په دې هېواد کې خپل ډیپلوماټیک حضور په مؤقت ډول ځنډولی دی.
د روسيې د بهرنیو چارو وزارت پرون وویل، دا ګام يې په یمن کې د امنیتي وضعیت خرابېدو ته په پام پورته کړی دی.
د بهرنیو چارو د وزارت ویاندې ماریا زاخارووا وویل، د روسيې سفیر او یو شمېر ډیپلوماټان به د سعودي له مرکز ریاض څخه فعالیت کوي.
د یمن لپاره د روسيې سفیر له یوه کال راهیسې له ریاضه فعالیت کوي.
مسکو تېره اوونۍ خبرداری ورکړ چې یمن د پوځي او سیاسي ګډوډۍ په لور روان دی.
د یمن حکومت چې سعودي عربستان يې ملاتړ کوي له ۲۰۱۴ میلادي کال راهیسې له شیعه حوثي ملېشو سره په جګړه کې ښکېل دی.
حوثیانو له ۲۰۱۴میلادي کال راپدېخوا د یمن پایتخت صنعا نیولی دی.
د یمن په کورنۍ جګړه کې تر اوسه پورې تر۸ زره او ۷ سوه پنځوسو ډېر کسان وژل شوي او ملګرو ملتونو د دې هېواد وضعیت د نړۍ تر ټولو ستر بشري ناورین بللی دی.