د افغانستان مشرانو جرګه په کابل کې د يوې کورنۍ د ۱۰ غړو په وژنه کې د درېیو تورنو کسانو د علني محاکمې غوښتنه کوي.
د مشرانو جرګې لومړي مرستیال محمد علم ایزدیار چې د سې شنبې د ورځې د جلسې مشري یې کوله ټينګار وکړ چې یاد کسان باید د اشد مجازات يا اعدام په سزا محکوم شي.
نوموړي وویل:
"دوی باید د افغانستان د قوانینو په اساس، په اشد مجازات محکوم شي، تر څو دوی او نورو خلکو ته عبرت وي او په راتلونکي کې له دا ډول جنایتونو مخه ونیول شي."
د کابل پولیسو درې ورځې وړاندې ویلي وو چې د ۱۵مې حوزې اړوند د ۵۰۰ فامیلیو په سیمه کې د يوې کورنۍ ۱۰ غړي د وسلې په وسیله د نامعلومو کسانو له خوا وژل شوي او دوه نور ټپيان شوي، خو پولیسو تېره ورځ دغه درې کسان په بغلان کې ونېول.
دا لومړی ځل نه دی چې په کابل کې دا ډول پېښه رامنځه کېږي، څه موده مخکې د ۱۰مې امنیتي حوزې اړوند د پایکوب نصوار په سیمه کې د یوې کورنۍ ۵ ماشومان په ورته یوه پېښه کې ووژل شول.